MZU in kan mamawhna min dawl zo tawh lova, tihlen zel tumin hma lak mek a ni - Chief Minister

Chief Minister Zoramthanga chuan Mizoram University in kan mamawhna min dawl zo tawh lova, tihlen zel tumin hma pawh an lak mek thu a sawi.

ICFAI University, Mizoram in an University Auditorium-a Freshers' Social, 2023 nimin-a an buatsaih a hmanpuina ah Chief Minister Zoramthanga chuan ICFAI in Campus tha leh zau tak an nei chu an vanneih thu leh Mizoram-a University din duh Institution dangte pawh an awm nual thu a sawi a. India sawrkar nena inremna an siam khan University din chu ziah tel a nih thu leh State sum atanga hetiang zirna In lian leh tha din hi a hautak em em thu a sawi a, “Kan inremna ang ngeiin Mizoram University tha tak kan nei ta a, tunah phei chuan India ram huapa zirna In tha a lo tling ta hial a, kan chhawr em em a ni. Mahse Mizoram University pawhin kan mamawhna min dawl zo tawh lova, tihlen zel tumin hma pawh kan la mek a ni,” a ti a. “University Seat mamawhna a san em em laiin ICFAI in rawn lang a, sawrkarin phalna pein in han indin a; kan ramin kan chhawr em em che u a, Mizoram tan in tangkaiin a lawmawm em em a ni”, a ti bawk. Chief Minister chuan zirlaite chu tha taka zirchhuaka, hlawhtling tura bei a, chhungkua, ram leh hnam tana mi ttangkai tak nih tum tlat turin a fuih bawk.

Nimin-a he hun hmanna ah hian ICFAI University-a Registrar Dr. David Lawmzuala chuan an University chanchin tlangpui tarlangin, New Education Policy zuiin kumin atangin an Course Structure an thlak vek a, Programme Course 12 an kalpui mek thu leh kumin atangin an University-ah hian Ph.D a zir theih tawh dawn tih a sawi a. Zirlai lut tharte chu kawng laka pil bo mai lova tha taka an zirlai te zo ngei turin an beisei tih a tarlang bawk.

ICFAI University Mizoram hi Section 4(2) of the Institute of Chartered Financial Anslysts of India University, Mizoram Act, 2006; Mizoram Legislative Assembly in a passed behchhana din a ni a, Chaltlang-ah mimal In luahin bul an tan a, kum 2011 atangin tuna an awmna Durtlang North-a an Campus ram 17.58 acres-a zauvah ah hian an insawn leh a ni. Tunah hian zirlai 630 an awm mek a, thawktu hi Assistant Professor 28 leh Guest Lecturer 30 neiin, an zinga zaa sawmsarih (70%) hian Doctorate Degree an nei a. Non-Teaching Staff te nen thawktu zawng zawng hi mi 92 vel an awm mek a ni.