Chhungkaw 35,737 ten In sak tanpuina dawng tawh

Mizoram pumah PMAY-HFA (Urban) Mission hnuaia In sak tanpuina dawng tur zinga chhungkaw 35,737 ten 1st Installment Rs. 60,000/- theuh an dawng tawh.

PMAY-HFA (Urban) Mission hnuaiah hian Mizoram pumah mirethei Insakna dawng tur (beneficiaries) chhungkaw 37,244 an awm a, heng zinga chhungkaw 35,737 ten 1st Installment Rs. 60,000/- theuh an dawng tawh a, ala dawnglo chhungkua 1507 te hi September ralhmain 1st Installment Rs. 60,000/- theuh dawn tir hman turin theihtawp chhuah mek a ni. Kum 2024 ralhma ngeiin chhungkua zawng zawngte hi Insak tanpuina an dawng tur ang zawng zawng pe kim vek hman tura hmalak mek a nih thu sawrkar thuchhuah chuan a tarlang bawk a ni. PMAY-HFA (Urban) Mission hnuaiah hian Mizoram khawpui hrang hrang (Census Town) 23-ah Insak tanpuina hi kalpui mek a ni a, tanpuina hi Rs. 1,50,000/- pek tur niin thawh thum-a pek tur a ni a. 1st Instalment Rs. 60,000/- pek niin 2nd Instalment-ah hian Rs. 60,000/- bawk pek leh tura ruahman a ni a, a thawh thumna ah hian Rs. 30,000/- pek tur a ni dawn thung a. Tanpuina sum pek an nih hmain inhrilfiahna hun (Sensitisation Programe) neihpui thin an ni bawk.