PWD-a JE hna thawklai thiamloh chantir a ni

Aizawl District and Session Court (Prevention of Corruption Act) Special Judge Dr. HTC. Lalrinchhana chuan PWD Engineer C. Lalfakawma chu hlemhletna thubuaiah thiamloh a chantir.

Nimin-a Court thutlukna in a tarlan danin he thubuai hi Mizoram sawrkar PWD-a Deputy Secretary in May 20, 2020-a Mizoram Lokayukta-a thubuai a thehluh atanga intan niin C. Lalfakawma (Chawnga Road, Khatla South) hi PWD Khawzawl Division-a JE hna a thawh laiin a hna enkawl lai Rabung atanga Aiduzawl kawng laih leh enkawl zui thawktu Contractor Lalroenga hnen atangin dikhlel takin pawisa cheng nuai 17 la a puh a nih bakah, Sub- Contractor Vanhmingthanga hnen atangin cheng nuai thum dikhlel taka dawnga puh a ni bawk.

Court-a thubuai ngaihtuah a nih lai hian Lalroenga leh Vanhmingthanga te hi Sawrkar lam thu hretu a an tanna ah an inhnuhdawh avangin thamna sum emaw dawng anga an puhna chu finfiah theih a ni lo a. Amaherawh chu Central PWD Manual, 2014 Clause 33-na kalha, ama duhsak zawng Sub-Contract hna a lo siam sak avangin Section 409 IPC leh Section 13 (2) of PC Act, 1988 angin thiamloh chantir a ni ta tho a ni.