Online (Internet) hmanga Revenue Department-a Chhiah pek theihna tur tlangzarh a ni

Mipui ten Online (Internet) kaltlanga Chhiah an pekna tur, ‘Online Tax & Zoram Chhiah Payment’ chu nimin khan Land Revenue & Settlement Minister Lalruatkima chuan mipuite hman theih turin a tlangzarh.

‘Online Tax & Zoram Chhiah Payment’ tlangzarhna puala inkhawm Assembly Conference Hall, Aizawl-a neih ah Revenue Minister Lalruatkima chuan Online hmanga Chhiah pekna tur an hawn thar chu Mizoram tan Mellung pawimawh tak phunna a nih thu sawiin, Online Revenue Payment System hi hun rei tak ata tawh neih ve an chak leh an nghahhleh em em a nih thu a sawi a. Chhiah pek chu khua leh tui ten kan tih tur, kan mawhphurhna a ni tih kan hriat a pawimawh thu sawiin, “A hun taka chhiah pek hi kan tum a pawimawh a, kan inzirtir pawh a tul hle a ni,” tiin he Online Payment System thar hmang hian mipuiten mahni Inchhug lum atangin awlsam takin Chhiah kan pe thei tawh dawn tih a sawi bawk.

Online Payment Bank Partner atan HDFC Bank hman a ni a. LR&S leh HDFC Bank te hian November, 2021-ah inremsiamna thluthlung (Deed of Agreement) ziakin February, 2022 ah Law & Judicial Department in an Vet a, Mizoram State e-Governance Society (MSeGS) in a Software hi a thlawnin an siam sak a, anni hian a enkawl zui hna an thawk bawk ang.

Nimin-a he hun hmanna ah hian Revenue Minister hian Survey of Villages Abadi and Mapping with Improvised Technology in Village Areas (SVAMITVA) Scheme hnuaiah Property Card a semchhuak nghal bawk a. SVAMITVA Scheme hi sawrkar laipui Ministry of Panchayati Raj hnuaia Central Sector Scheme niin he Scheme hnuaiah hian Drone hmangin thingtlang khuaa mihring chenna hmunte thla lain hemi hmang hian Property Card siam sak theuh an ni. Property Card kaltlang hian mipuite chu dan anga ram neitu nihna pek an ni a, hei hian ramri chungchanga buaina a tihtlem bakah khaw hmunhma ruahman (Town & Village Planning) leh Loan lak kawngah te awlsamna a thlen beisei a ni a. Sawrkar laipuia Ministry of Panchayat, State sawrkar Land Revenue & Settlement Department leh Survey of India te thawhhona hnuaiah heSscheme hi kalpui a ni.

Tun dinhmunah Mizoram-a khua 319-ah he Scheme hi kalpui tura ruahman a ni a, khaw 171-ah te Drone hmanga thlalak tan a ni tawh a. Hmarchhak State zingah Phulpui leh Tachhip te chu Property Card semchhuahna hmasa ber niin, April ni 24, 2023 khan Property Card 420, Phulpui-ah 166 leh Tachhip-ah 254 semchhuah a ni a Nimin khan khaw 7 – Thiak (161), Sumsuih (158), Hmuifang (63), Lamchhip (113), Chamring (56), Sailam (164) leh Lungsei (48)-ah te Property Card 763 semchhuah a ni a, heng khaw Village Council hruaitute hnenah Map, VC Area chunga ram neitute hming leh an ram neih chin tarlanna hlan an ni bawk.