Private Cabin Block hawng

State Referral Hospital - Zoram Medical College, Falkawn a Private Cabin Block sak thar chu nimin khan Health Minister Dr. R. Lalthang-liana chuan a hawng.

CSS leh Special Central Assistance sum hmuh hmanga sak Cabin Block thar hi sanction amount chu cheng nuai 1153.35 niin February 26, 2020 khan a sak phalna, Administrative Approval hmuh a ni a, CSS sum cheng nuai 225.80 leh Special Central Assistance atanga sum hmuh cheng nuai 927.73, a vaiin cheng nuai 1153.35 senga sak a ni a. July 15, 2023 khan sak tan niin kumin March 20-ah sak zawh a ni. He Building hi chhawng nga (5) niin Room 49 - VIP Room 8, Semi Cabin 2 leh Cabin 39 awm tura ruahman a ni a. Heng room 49 zinga 20 chu mi inphal mi 8 sum thawhkhawm tlingkhawm cheng nuai 54 bakah PMJAY, ZMC leh RKS of SRH atanga sum (leh bungraw thenkhat) thawhkhawm hmangin peihfel a ni.

Nimin-a building thar hawnna hunah hian Health Minister Dr. R. Lalthangliana chuan Mizo-ram-a damlo inenkawlna leh mipui hriselna in hma a sawn theihna tura hmalakna hrang hrang tarlangin, District hrang hrangah tunhnaia Hospital hawn a nih thu te, a awm sa tichangtlung tura hmalak a nih dan te a sawi a. Civil Hospital Aizawl pawh a theih ang anga thuamthat a nih dan leh, tunhnaiah Nephrology Department siamin mi tam takin an tangkaipui thu te, Aizawl bakah District dang danga ICU siam belh a nih thu te a sawi. Minister chuan Mizoram chu Cancer tamna State a nih avanga JICA nen tangkawp a Super Specialty Cancer Hospital din turin hmalak mek a nih dan te, Champhai a Critical Care Hospital siam tum a nih thu te a sawi bawk.

Nimin-a hawn tak he building sakna ah hian a chhung cheina leh mamawh dang chu mi inphal ten an thwhkhawm a, heng mi 8 te hnenah hian Donor Card chu Minister hian a hlan a ni.