Mizoram-a buh leh bal thar hlawk theih loh chhan hmunhma ngai leh ngai-a thlai chin thin vang niin sawi

Agriculture Minister C. Lalrinsanga chuan Mizoram in buhbal a thar hlawk theihlohna chhan chu hman atanga hmunhma ngai leh ngaia thlai chin a nih thin vang tih sawiin, Lui tui kang zel karah leihnuai-a tui awm an zawnna atanga an hmuh danin Ground Water dinhmun a la tha hrih niin a sawi.

Agriculture Minister C. Lalrinsanga hian nimin khan Aizawl Press Club-ah thuthar thehdarhtute kawmin kum nga chhunga a Department chan pathum- Agriculture Department, Irrigation & Water Resources leh Cooperation Department te hmasawnna leh hmalakna te a tarlang a. Minister hian Agriculture Department chuan Pilot Project hnuaiah kum 2022-23 ah Vaimim hmanga hma la hmasa berin NAFED nena tangkawpin Vaimim chi tha, SURAJ 251 chin a nih thu a sawi a. Vaimim tharchhuah te hi District hrang hrangah pawl leh mimal ten khawtual-ah herin ranchaw siam nan an hmang tih sawiin, hei bakah hian AH&Vety hnuaia Animal Feed Plant, Tanhril-ah hralh a nih thu a sawi bawk. Tun dinhmuna Mizoram in buhbal a thar hlawk theihlohna chhan chu hman atanga hmunhma ngai leh ngaia thlai chin a nih thin vang a nih thu a sawi a, hei hian leilunga leitha nasa taka a luanral pui avangin thlai tharchhuah a pung hleithei lo a, thlai tharchhuah tipung turin harsatna a siam a ni, a ti bawk.

Agriculture Minister C. Lalrinsanga chuan ramngaw thiata lo neihin Environment danglamna a thlen avangin bultanna thar atana hmalak nan FOCUS hnuaiah IFS (Integrated Farming System) kalpui a nih thu pawh a sawi a, Permanent Farming System kalpui nan Terrace zau tak tak FOCUS fund hmangin Khawrihnim, Chhungte, Samthang, Hualtu, Sialsir, Chawngtlai, Chhawrtui, Lungchhuan, Suangkuang leh Thingdawl Village Area-ah te laih a nih thu a sawi a. Heng Terrace-ah te hian thlai thlan bik Fur Zikhlum, Tomato leh thlai dangte chin niin tharchhuah tipung turin Bio-fertilizer te hmangin ruahmanna kalpui mek a nih thu a sawi bawk.

He hmalakna hi tlangram loneih dan thar bultanna atana hman tum a nih thu pawh sawiin, Terrace hi chherchhuan thum (3-Tier System) a siam a ni dawn a, a chhuan hnuai berah Tin khat hmun aia zim lo leh a chherchhuan laita ah Cash crop (sum chang thlai) leh thlai dang remchang chingin, a chhuan thumna, a lu ber ah hian Ngaw (Forest) a siamin sum chang thei thingkung – leh thlai remchang dang phun a ruahmanna kalpui tum a nih thu a sawi bawk.

Tunhma zawngin leihnuaia tui (Ground Water) hman tangkai tuma hmalakna la awm ngai loh thu leh Lui tui kang zel karah leihnuai a tui awm an zawnna atanga an hmuh danin Ground water dinhmun hi a la tha niin a sawi a, PMKSY-HKKP, NABARD leh PM-KUSUM hnuaiah Ground Water Irrigation Project nasa taka kalpui a nih thu Minister chuan sawiin, hmun hrang hranga an hmalakna te a tarlang bawk. 

Comments

Popular News (Last 30 Days)

Vawiin-ah HSSLC Exam result