Mizoram UPC General PYD Inkhawmpui nei tan dawn

Mizoram UPC hnuaia thalaite intawhkhawmna lian ber, General PYD Inkhawpui vawi 27-na chu zanin hian Serchhip-ah neih tan a ni dawn a, tunkar Pathianni zan thleng a awh ang.
Mizoram UPC General PYD Inkhawmpui hi zanin dar 7:00 hian P&E Veng-a Leisekawt Mual-ah neih tur niin zanin hian Inkhawmpui hlanna neih a nih hnuah Palai lawmna neih a ni dawn a, naktuk Inrinni-ah Rorel Inkhawm neih tur a ni ang. He Khawmpui hmang tur Palai te chuan Vawiin hian Serchhip an rawn thleng dawn a, Palai te hi Veng 8-ah lo hmuah tur niin YMA Branch 8 huamchhungah thlentir an ni dawn a ni.

Leisekawt Mual-a he Inkhawmpui neih tur avang hian Serchhip SP chuan Vawiin tlai dar 5:00 atanga Pathianni zan dar 11:00 inkar chhunga Serchhip P&E Veng-a lirthei tlan dan tur ruahmanna a siam a. Hemi ang hian AOC - IOC via P&E kawng chu 'One Way' niin AOC lam atang chauha tlanluh phal a ni a, Inkhawm tur Quarry Road lam atanga kalte chu Soil peng-ah rawn chhoin Mini Park-ah an in drop ang a, IOC lam panin an tlanlet leh anga, Soil peng leh Mini Park inkar bik hi a tawn tawna lirthei tlan theih niin Mini Park, P&E Veng-a V. Lalrammawia In leh Romandinga In inkar kawng chu 'No Parking' ah puan a ni a, Lirthei eng chi mah park phal a ni lo.

Serchhip DRDO Office opposite atanga Leisangkawi kawng-ah lirthei ke thum nei (3 wheeler) leh ke hnih nei (2 wheeler) te tan chhuk zawng-a tlan phal niin lirthei ke li (4 wheeler) leh a aia lian tan tlan phal a ni lo thung a. P&E Veng, Serchhip chhunga Kohhran hrang hrang inkhawm tura Lirthei-a kalten Hmar lam atanga lane hnuai kawng zawhin lane hnuai atanga Bethel Kohhran Biak In kawt kawngpui pawh turin YMA Hall kawt kawngah tlan chhoh theih a ni ang. Hei bakah hian Lane hnuai, Quarry Road, Soil Peng leh Mini Park atanga P&E Veng Main road pawhtu kawng zawng zawngah chho zawng chauhin lirthei tlan phal a ni bawk.