IAH Thenzawl-ah Lung enna khawl hmang tan dawn

Integrated Ayush Hospital (IAH) Thenzawl chuan Lung (Heart) lam natna enna khawl an neih thar, Electro-cardiogram (ECG) chu Vawiin hian an hmang tan dawn a, khawl thar lawm nan Vawiin bik hian Rs. 50/- chawiin he khawl hi hman theih a ni ang.
ECG khawl thar IAH Thenzawl-a dah tak hi Rs. 53,000/- man niin he damdawi In-a Medical Superintendent Dr. B.Lalhriatpuia chuan Directorate atanga pawisa an hmuh hmangin ECG khawl thar hi lei anih thu a sawi a, he khawl hmang duh leh khawsak harsatna avanga kalna tur nei lo an awm a nih chuan thawktute hnena in hriattir turin an ti a, an kalna tur ruahman sak an tum thu leh khawl hmanga inentirna senso tur harsa te pawh inthlahrung lo turin an chah bawk.

IAH-a Medical Superintendent chuan ECG bakah hian X-Ray khawl an neih theihna turin Directorate lam atangin ruahmanna a kal mek thu a sawi a. Ultrasound pawh permit buaipui mek a nih thu a sawi bawk.

Integrated Ayush Hospital, Thenzawl hi khum 50 awmna niin Medical Superintendent hovin Doctor 6 leh Staff Nurse 8 an awm a, tunah hian Panchakarma Therapy, Nausen Pneumonia leh natna dang vanga damdawi In-a admit an awm nual a, khum ruak a awm thei meuh lo nia thudawn a ni bawk.