Fisheries Department in SEDP dawng turte kokhawm

Serchhip-a Fisheries Department chuan Family Oriented SEDP 2nd Phase 1st Instalment-a an Department hnuaia tanpuina dawng turte nimin khan kokhawmin an Bank Account te an enfiah sak bakah tanpuina sum an hman dan turte an hrilhfiah.
Serchhip Hmar Veng YMA Hall-a he hun hman hi Serchhip District Fisheries Development Officer (DFDO) Lucy Lalrinpuii chuan kaihhruaiin sawrkar laipui leh State sawrkar ten mirethei te tan kawng hrang hranga hma an lak thin thu leh tunah pawh SEDP tanpuina sem tura ruahman leh mek a nih thu a sawi a. Family Oriented SEDP 1st Phase-ah an Department kaltlangin mi 111 ten tanpuina thawh hnihna thleng an lo dawn tawh thu leh tun tumah hian mi 84 ten dawng leh tura ruahman a nih thu a sawi a. Heng te hi Serchhip Bial-ah 29, Tuikum Bial-ah 24 leh Hrangturzo Bial-ah 31 te an nih thu a sawi a. Tun thla ni 15 hmain tanpuina dawng turte hi an Bank Account te enfiah vek tur leh September thla chhunga 1st Instalment pekchhuah hman tura ruahman a nih laiin, an hmalakna kal mekah Serchhip District chhunga Sangha khawitute tan Sangha note sem hna kalpui mek a nih avangin hetiang hian inkokhawm an nih thu a sawi bawk.


Serchhip DFDO chuan SEDP kalphung leh a thiltum te sawiin, Village Level, District Level leh Department te hmalakna leh tihtur chin mumal taka ruahman leh thliarfel vek a nih thu a sawi a. Department chu tanpuina dawngtute hnathawh dan lo kawhhmuhtu leh an hmalakna te enfiahtu an ni tih sawiin, tuna an Department hnuaia tanpuina dawng turte chu Sangha Dil nei tawha ngaih an nih thu leh tanpuina an dawn te hman dan tura ruahmanna awmsa hrang hrangte a sawi a. |anpuina dawng turte chu rinawm taka an sum dawn te hmang tur leh lawm nanchang hre turin a chah bawk.

Nimin-a he hun hmanna ah hian Thenzawl Circle-a AFO C. Lalhminghlua chuan tanpuina dawng turte fuihna thu sawiin, tanpuina sum te a nihna tur ang ngeia hmang turin a fuih bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar