CAG Report-a City Park cheina AMC in an sawifiah

Comptroller & Auditor General of India report chuan Aizawl Municipal Corporation (AMC) chu City Park cheina atan dan dik lova cheng vbc. 1.01 hmang ah puhin AMC chuan hei hi DPR an lo deuha hna hi thawh a nih thu a sawi thung.

August ni 23,2023-a Assembly House-a pharh tak Comptroller & Auditor General of India report in a tarlan danin Atal Mission for Rejuvenation and Urban Transformation (AMRUT) sum cheng vbc. 1.01 hmanga City Park cheithatna atan AMC leh Aijal Club thuneitute chuan October 2016 khan inremna an ziak a. Inremna ang chuan he sum hmang hian cheng nuai 14 man naupang infiamna hmanrua pipu, tawlhpahrit leh infiamna hrang hrang dah tur a ni a. Hei bakah hian cheng nuai 3.02 hmangin Gate No. 2 siam tur a ni bawk a. Mahse heng te hi siam lovin thildang atan hman a ni a, a vaiin nuai 17.02 chu hmun dangah pawhpen a ni tih a tarlang.

CAG report chuan AMRUT Guideline-ah chuan mipuite mamawh chi hrang hrang tui intur, veivahna awlsam siam, intihhlimna hmun (park) siam te a ni a. Mahse AMRUT inkaihhruaina kalhin thiltih a niin City Park chu engemaw Exhibition leh Fair-ah te chauh mipui tan luh theih a ni a. Mipui nawlpui tan luh theih a ni lo a, mipui sum hmanga siam nisi Gate a inkalh reng bawk a. Hei bakah hian City Park luhna atan hian lei dawh a niin chu lei hmang chuan Aijal Club atang chauhin kalpawh theih a ni tih a tarlang a. Pawisa vbc. 1.01 sum hmanna hi Club member te chauhin an chhawr/hlawkpui anih avang leh mipui vantlang in an hlawkpui ve loh avangin AMRUT inkaihhruaina (guideline) kalh a ni tih a tarlang bawk.

Hetihlai hian AMC chuan he hnathawh chungchang hi sawifiahin, Atal Mission for Rejuvenation and Urban Transformation (AMRUT) Scheme a Component awm zinga pakhat ‘Green Space & Parks’ atanga tih turin Aizawl City Park-ah cheng vbc. 1.013 senga cheina tur Detailed Project Report, UD&PA in a siam chu April 18, 2016-a State Level High Power Steering Committee (SLHTC) thukhawm chuan a pawm thu an tarlang a. May 23, 2016-a SLHTC thukhawmin AMC khawih tur atan AMRUT Component pahnih –Urban Transport leh Green Space & Parks chu a tih tak avangin AMC chuan hma la nghalin City Park hi Aijal Club enkawl anih avangin Meeting neih a nih thu leh Revised DPR chu pawmpui turin Director, UD&PA hnenah December 21, 2016-ah thawnin chu DPR-ah chuan Aijal Club nen a MoU hi telh a ni bawk tih an tarlang.

AMC thuchhuah chuan hnathawh chhung hian Aijal Club aiawhte nen hnathawh dan tur leh thawh chin te enho zel a nih thu leh Contractor pawn hna tha taka thawkin August 31, 2018-ah a thawk zo ta niin an sawi a. DPR ang lo deuh a thawh a ngaih changte a awm thin niin an tarlang bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man