Zofate harsatna ah Mizoram sawrkar a tlanchhe dawn lo

Assembly Speaker Lalrinliana Sailo chuan Manipur tualchhung buaina avangin mi tam takin Mizoram an pan thu leh, Zofate harsatna ah Mizoram sawrkar chu a tlanchhiat dawn loh thu a sawi.

Commonwealth Parliamentary Association India Region Zone III Annual Conference vawi 20-na July ni 28 atanga Vawiin thlenga Shillong, Meghalaya-a neih meka Executive Committee thutkhawmah Mizoram Assembly Speaker Lalrinliana Sailo chuan he thu hi a sawi a. Speaker chuan Manipur tualchhung buaina avanga mi tam takin Mizoram an rawn pan thu tarlangin, Zofate harsatna ah Mizoram sawrkar chu a tlanchhe dawn lo tih a sawi a, Ramchhunga buaina punlun zel leh mahni ram chhunga India khua leh tui te ngeiin an tawrhna chu hawisan lova, theihtawpa tanpui turin CPA Zone III member te chu a sawm bawk a ni.

He hunah hian Deputy Speaker Pu H. Biakzauva pawh telin India hmarchhak bialin India ram hmun zau zawk tluka hma a sawn ve theih nan inkawlpawhna tha a pawimawh thu leh chumi atana India sawrkar hmalakna te a tarlang a. Kaladan Multi Modal Transit Transport Project leh NH. 54 zauh te chuan hmarchhak bialah hmasawnna tam tak a thlen thei dawn a ni, a ti bawk.