Vote nei thei 8,38,039 awm

Mizoram puma Electoral Roll Special Summary Revision neih tur atan nimin khan District tinah Draft Electoral Roll tarchhuah a ni a, Draft Electoral Roll atanga a lan danin Assembly bial 40-ah Polling Station 1276 awmin Vote nei thei mipa 4,06,747 leh hmeichhia 4,31,292, an vaiin 8,38,039 an awm mek a, Mipa aiin hmeichhe vote nei 24,545 in an tam zawk a ni. Mizoram pumah hian Service Voters mipa 4932 leh hmeichhia 89, a vain 5021 an awm mek bawk a ni.

District hrang hrang zingah Aizawl District chu Vote nei thei tamna ber niin Vote nei thei 2,81,192 an awm a, Lunglei District-ah vote nei thei 98,516; Lawngtlai District-ah 89,749; Mamit District-ah 63,688; Kolasib District-ah 62,659; Champhai District-ah 56,438; Ser-chhip District-ah 53,813; Saitual District-ah 55,100; Siaha District-ah 43,569; Khawzawl District-ah 17,440 leh Hnahthial District-ah mi 15,875 an awm bawk a ni.

India khua leh tui dik tak,ni 01.10.2023 a kum tling turte chuan August 2, 2023 atanga August 31, 2023 chhungin mahni bialtu ERO/AERO/BLO hnenah Electoral Roll a inthunluh dilna thehluh theih a ni a, https://voters.eci.gov.in leh Voter Helpline App-ah thehluh theih a ni bawk.