Vawiin LENKAWL kum 42-na

Vawiin August 14, 2023 hian LENKAWL Chanchinbu chuan kum 42 tlingin a kum 43-na a hmang tan dawn ta a, Pathian kaih-hruaina zarah harsatna hrang hrang thleng thei kara kum 42 zet tluang taka tihchhuah a ni thei ta hi lawmawm kan ti a. Tlawmngai taka chanchinbu min laksaktu leh min hlut saktu te, thuchhuah tur min pe thintu mimal, pawl leh Kohhran te bakah sawrkar chung-ah a tharin lawmthu kan sawi a. Hun lo kal zel turah he Chanchinbu hi Serchhip khawtlang tan a ni tih hriaa neitu chan chang zel turin kan sawm che u a, Serchhip khawtlang tana tangkai a nih zel theihna tura hmang tangkai zel turin ka sawm bawk che u a ni.


Khawvel nunphung a danglam zel a, Print Media te pawhin harsatna an tawk ve zel a, Mizoram-a kan chanchinbu tam tak te pawhin he harsatna hi tawkin Chanchinbu tam tak chu mumal taka tihchhuah hleih theih ni tawh lo te pawh a awm. Hetiang karah hian tun thlenga Pathian zarah tluang taka kan la tichhuak zel thei leh mi tam tak ten min la hlut saka Vawiin thlenga ke kan la pen ve zel hi lawmawm kan ti a. Mipui ten thuthar dik leh rintlak an hmuha an hriat theihna tura theihtawp chhuah zel tura phurna min pe thintu te in ni.


Social Media in min chenchilhna khaw-vel ah hian lehkha chhiar erawh tun aia kan uar thar hi a pawimawh hle mai a. A bik takin thalai te zingah lehkhabu leh Chanchinbu te chhiar ngai lo, kan chhehvel-a thil thleng te pawh hre ngai mang lo kan tam chho ta viau mai a. Kan thalaite zinga mi hlawhtling ti-a kan sawi thin te hi Social Media aia Lehkhabu leh chan-chinbu la chhiar tam zawk te an la ni tlangpui tih i hre thar leh teh ang u.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result