Parliament-a sawrkar rintawk lohna Motion putluh Mizoram Lok Sabha MP in a thlawp dawn

India ram Parliament, Lok Sabha-a Manipur a buaina thleng avanga Sawrkar rintawk lohna (No Confidence motion) Eptuten an putluh chu nimin khan sawiho tan a ni a. Mizoram-a MP (Lok Sabha) neitu MNF Party chuan he Motion hi an MP chuan a thlawp dawn tih an sawi a ni.

Nimin khan MNF Thalai, Mizo National Youth Front (MNYF) chuan thuchhuah siamin sawrkar laipui in Manipur tualchhung buaina a chinfel theihloh avanga eptu party tangrual ten Lok Sabha Session neih mek a 'No Confidence Motion' an putluh chu debate neih mek a nih thu leh Mizoram chhunga eptu party thenkhat te’n mipui rilru hruaikawi theih beisei a thudiklo an vawrh darh chu pawi an tiin, thudiklo hmanga mipuite bum hreh lo political party an la awm chu Mizo kan nihna ang pawhin zahthlak an tih thu an sawi a. Sawrkar rintawk lohna ‘No Confidence Motion’ lut hi August ni 8 atanga ni 10 chhungin Parliament House-ah la sawiho chauh tur a ni tih tarlangin, “MNF chuan kan ram leh hnam, kan Sakhua himna hi a ngaih pawimawh ber a nih avangin eptu party tangrual in Lok Sabha Session kal meka sawrkar rintawk lohna (No Confidence Motion) an putluh hi MNF chuan a thlawp dawn tih Zoram mipui hriat ah kan puang a. Kum 20 chhung silai hmanga India sawrkar lo do ngam tawh Pu Zoramthanga kaihhruai MNF hian kan ram leh hnam, kan Sakhaw tana pawi thei turah chuan NDA emaw, BJP emaw pawh nise a do ngam hle tih Zoram mipui ten an hriat kan duh bawk a ni,” an ti.

RD Minister Lalruatkima pawhin Lok Sabha-a Sawrkar rintawklohna (No-Confidence Motion) chungchangah hian Mizoram Sawrkar chuan dinna nghet leh ngaihdan mumal tak a neih avangin Mizoram MP pawh he sawrkar rin tawk lohna sawihona-ah hian tel ngei tura tih a ni tih sawiin, “Manipur lama Zohnahthlak ten harsatna an tawh hre chung leh an tawrhna hi a tawmpui tlat a, sawrkar laipui rorel dan chu tha a tih loh avangin, he Sawrkar rin tawk lohna (No-Confidence Motion) hi Mizoram Sawrkar chuan a thlawp dawn a, vote pawh sawrkar rintawk lohna lamah hian thlak ngei a tum a ni,” tih nimin khan a sawi bawk a ni.