Myanmar raltlan te kutzia lak hna kalpui a ni dawn

Myanmar atanga Serchhip District-a raltlan la awm mek te chhinchhiah hna chu tun thla chhung hian thawh tum a ni.
Hemi chungchanga Serchhip District in mipuite hnena hriattirna a tihchhuah angin Sawrkar laipui Ministry of Home Affairs thupek angin tun thla, August, 2023 chhung hian Serchhip District chhunga Myanmar raltlante chhinchhiah vek tura hma lak a ni dawn a, heng raltlan te hi Biometric leh Biographic kimchang lak a ni dawn a. Myanmar raltlante awmna khuaa thawktute an kal hunah Village Council te chu thawktute tawiawm turin Serchhip DC chuan a ngen bakah Myanmar raltlan te hi kim taka chhin-chhiah an nih theih nan ruahmanna lo siam turin a chah bawk a ni.

Thudawn danin kumin April 28-aUnion Home Secretary Ajay Kumar Bhalla kaihhruaia Mizoram leh Manipur aiawhte leh Assam Rifles DG te an thutkhawm tum khan Myanmar atanga raltlante chhinchhiaha biometric details lak an rel a. Hemi bawhzui hian Mizoram sawrkarin chuan hma lain tunhnaiah khaw thenkhata Myanmar raltlante chu an kutzia laksakin an kutzungpui pahnih leh kutzungtang dang pali zia te lak niin Champhai District-ah hma lak a ni tawhh a ni.

Myanmar raltlan zingah biometric ti lo an awm a nih chuan India ramah awmtir phal an ni dawn lo a, sawrkar atanga hamthatna an dawn theih ang pawh an dawng thei tawh dawn lo nia thudawn a ni bawk.