Myanmar raltlan chanchin kimchang lakhawm tan

Mizoram-a awm Myanmar raltlante ‘biometric’ leh an chanchin kimchang lakkhawm hna chu niminpiah-ah tan hman a nih loh avangin nimin khan thawh tan a ni a, Serchhip District-ah pawh he hmalakna kalpui tur hian ruahmanna engkim peihfel a ni tawh.
Home Department hotute chuan Myanmar raltlante chanchin kimchang leh ‘biometric’ data lakkhawm hna hi niminpiah khan kalpui tan tum ni mah se Hnahthial District Official-te an inpeih chian hman loh avangin nimin atangin thawh tan a ni tih an sawi a. Ministry of Home Affairs thupek angin Mizoram leh Manipur State-ah te Myanmar atanga raltlan lo lut te chu an chanchin kimchang taka lakhawm a, an lokalna te leh an kutzia, an Mit note thlalak te leh an nihna kimchang taka lak-khawm tur a ni a. Sawrkar laipuiin Myanmar raltlan te atanga an chanchin lakkhawm dan tur a buatsaih chu tih danglam a ngaih avangin kalpui lawk theih a ni ta lo a ni.

Serchhip District-ah pawh he hmalakna kalpui tur hian ruahmanna engkim peihfel a ni tawh tih Nodal Officer leh SDO (Sadar) Rebecca Laldinmawii Hrahsel chuan LENKAWL a hrilh a, he hmalakna kalpui tur hian Team 3 siam a nih thu SDO (Sadar) chuan sawiin, karleh Thawhtanni atanga hma lak tan an tum laiin Ministry lamin an la inpeih loh avanga la ti lo tura an tih avangin Ministry lam thu an ngaihchan thu leh ti tura an rawn tih veleh a chechhuak tura an in peih thu a sawi a ni. Serchhip District-ah hian Myanmar atanga raltlan rawn lut hi mi 340 vel an awm mek a ni.

Myanmar raltlan Mizorama awm zawng zawngte chu an chanchinte chhinchhiah a nih bakah Temporary Identity Card pek vek an nih tawh thu Home Department hotute chuan an sawi a. Tun dinhmunah Myanmar atanga raltlan 35,000 vel an awm nia chhutin Myanmar atanga raltlante chu dan lo a pem lut an nih loh thu an sawi a, an tualchhung buaina avanga sahimna zawnga lo lut an ni tiin Zofate deuh vek an ni tih an sawi bawk.