Mizoram Synod in Manipur buaina tuartu tan nuai 94 pe

Presbyterian Church of India, Mizoram Synod chuan Manipur tualchhung buaina avanga sahimna zawnga lo lut leh harsatna hrang hrang tawk te tan cheng nuaih 94 a pechhuak.

Mizoram Synod hian Manipur leh Mizoram-ah te tanpuina hi pek ani dawn tih thuchhuah siamin an tarlang a, May 3 atanga buaina intan ah hian harsatna hrang hrang tawk te tan cheng nuai 65 a lo pe tawh bawk a ni. Manipur-ah hian Synod hran, Manipur Synod nei mah se, Tangphai (Vaiphei) Presbytery chu Mizoram Synod hnuaia a awm a ni a, Mizoram Synod chuan Tangphai huam chhunga harsatna tawk te leh Relief Camp-a awm lo te tanpui nan cheng nuai hnih a pe bawk. 

Kuki-Zo tribal pawl hrang hrang inzawmkhawm, Indigenous Tribal Leaders’ Forum (ITLF) hnenah pawh an mamawh anga hman turin cheng nuai 5 a lo pe tawh a, Mizoram Synod hian Mizoram hmun hrang hranga in bengbel mek te tanpuina tur cheng nuai 22 a pe bawk a ni. 

Tun dinhmunah Manipur atanga sahimna zawnga lo lut zawng zawng hi an vaiin mi 12,622 an tling tawh niin sawrkar chuan an sawi a, heng zingah hian mi 9,843 chuan an chhungte leh thiante zawma an awm laiin mi 2,779 chu Relief Camp 38-ah an awm a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man