Mizoram-a Cyber Crime-ah sum-a inbumna a hluar

Mizoram Police te chuan tunlai thiamna hmanga misual ten mi an bumna ah sum leh pai hmanga inbumna a hluar ber tih sawiin, hemi kawngah hian mipuite fimkhur se an duh thu an sawi bawk.

Zirtawpni khan Aizawl Press Club-ah Mizoram Journalists' Association (MJA) chuan tunlai thiamna hmanga inbumna 'Cyber Crime' zirhona buatsaihin he hunah hian Cyber Crime Police thawkte chuan nikum lama case an neih zingah sum hmanga inbumna (financial fraud) chu a hluar ber tih an sawi a. Case an buaipui atanga chhutin sum leh paia inbumna hi 68% a tling tih an sawi a. Hei bakah hian Social Media lama inbumna leh mipat hmeichhiatna lam rawngkai chuan a dawt tih an sawi a ni. Sum lama inbumna ah hian Army scam chu a hluar ber tih sawiin, Internet lamah sipai thlalak leh ID lem te tarlangin hemi hmang hian mi tam tak bum an ni tih an sawi a. Tlawm deuha thil zuar leh lei duh ang ten an insawi a, mipat hmeichhiatna lam hawi thlalak thehdarh ah te an vau a, hei bakah Bank hnathawk anga insawiin ATM Pin leh thildang te an dil a, hemi hmang hian misual ten sum tam tak an laksak thin tih an sawi bawk. Police te sawi danin sum hmang inbumna chu hmuh let a har a, sum hmanga inbumna ah hian nuai 300 vel a kal tawh tih sawiin, heng zinga nuai 24 vel chauh hmuhlet a ni a, sum hmuhlet hi 10% pawh a tling lo niin an sawi bawk.