Hlawh pek thuai an phut

Mizoram RMSA Employee Welfare Association (MIREWA) chuan thla thum chhung hlawh an lak tawh loh chu a rang thei ang bera pe tura sawrkar an phut thu an sawi.

Nimin a thuchhuah an siamah Mizoram pumah Samagra hnuaia thawk mi 5,000 chuang an awm tih MIREWA chuan sawiin, May thla atang khan thla thum chhung hlawh an lak tawh loh avangin an mangang tak zet tih an sawi a. Samagra hnuaia thawkte hian a hun takah hlawh an la ngai mang lo nia sawiin, “Thla hnih te, thla thum te hlawh la lovin kan awm fo thin. Nupui fanau/pasal fanau hrawk chawm kan ni hlawm a, chhungkaw khawsak phung hrim hrim bakah kan fate zirna senso thlengin kan hlawh la har lutuk hian nasa takin min nghawng a, mangan-thlak kan ti hle a ni,” tiin Samagra hnuaia thawkte hlawh lak loh zawng zawng hi a rang thei ang bera ngaihtuah saka pe thuai tura sawrkar an beisei thu leh an phut thu an sawi a ni.