District and Sessions Judge-in Serchhip tlawhin District Court leh District Jail te a enfiah

Aizawl Judicial District-a District and Sessions Judge Vanlalenmawia chuan nimin khan Serchhip rawn tlawhin The Mizoram Victims of Crime Compensation (Amendment) Scheme, 2016 hnuaia Serchhip District-a zangnadawmna dilna lut te thlirho a ni a, Under Trial Review Committee thutkhawm neih puiin Serchhip District Jail pawh a tlawh nghal bawk.

The Mizoram Victims of Crime Compensation (Amendment) Scheme, 2016 hnuaia zangnadawmna dilna lut te ngaihtuaha thutkhawm Serchhip District Court Building-a neih ah District and Sessions Judge Vanlalenmawia chuan The Mizoram Victims of Crime Compensation (Amendment) Scheme, 2016 nihphung leh an hmanna te sawifiahin, he Dan hnuaia chhawmdawlna dawn theih dan te, pawihkhawihna thlen ni atanga chhiara chhawmdawlna dil theih hun chhung te, chhawmdawlna sum leh pai dawn theih zat te a tarlang a. He danin a tum ber chu mi tupawh misual kut tawrh avanga ramtuileilo a an awmin emaw, thihna an tawhin an chhungte hnenah chhawmdawlna pek a ni a, he ruahmannna hian pawngsual tuar te pawh a huam a ni, a ti.

Nimin-a thutkhawm ah hian he ruahmanna hnuaia tanpuina dilna lut 11 te chu thlirho niin heng zinga dilna pathum te chu chhawmdawlna hi pek tura ruahman a ni a, an zinga pahnih te hi POCSO Act hnuaia tuartute niin Rs. 75,000/- ve ve pek tura ruahman a ni a, midang pakhat hi an chhungkaw pa ber kahhlum a nih avanga tuartu ni thungin Rs. 2,00,000/- pek tura tih a ni a, dilna lut dang erawh chu thubuai kallai, Court in thuremna ala siam loh te a nih avangin la ngaihtuah tura dah a ni a, Court thuremna in pe tura a tih chuan pek nghal theih a ni bawk a ni.

Hemi hnu hian District and Sessions Judge Vanlalenmawia ho hian Under Trial Review Committee thutkhawm neih chhunzawm nghal a ni a, he Committee hian Bailable case ni si, Bail loh avanga Jail a tang engzat nge awm tih te; Chargesheet thehluh hun tawh, hun bithliaha thehluh hman loh avanga Jail tan hun tur aia rei tang an awm em tih leh engzat nge chutiang mi chu awm tih te an thlirho a. He huna tarlan a nih danin Serchhip District-ah hian tun dinhmunah Jail tang mi 65 awm mekin an zinga mi 25 te chu thubuai ngaihtuah tawh leh Court in thiamloh a chantir te niin an vai hian Mipa vek an ni a. Thubuai ngaihtuah lai (under trial prisoners) mi 40 awmin an zinga mi 34 te chu mipa niin midang 6 te chu hmeichhia an ni a. District and Sessions Judge chuan thubuai neih avanga man te chu ni 90 chhunga Chargesheet thehluh a nih loh chuan Bail-a chhuah tur a ni tih sawiin, tun dinhmunah Serchhip District Jail-a awm, thubuai ngaihtuah lai zingah Chargesheet thehluh tlai avanga Bail-a chhuah ngai an awm lo a ni.

District and Sessions Judge Vanlalenmawia hian nimin chawhnu lam khan Serchhip District Jail tlawhin Inspection a nei nghal a, Serchhip District Jail hi mi 130 tan theihna tura ruahman a ni. District and Sessions Judge hi Serchhip Chief Judicial Magistrate (CJM) R. Malsawmdawngzuala,  Civil Judge cum JMFC Serchhip Josangzeli Tlau, Civil Judge cum JMFC Aizawl HT. Lalmawizuala leh mi pawimawh dang ten an tawiawm a ni.