4-Lane leivung paihna tur chungchang sawiho a ni

Kolasib District chhung Vairengte leh Rengtekawn inkar 4-Lane kawng laih hun a leivung paihna tur, Muck Disposal site chungchang chu nimin khan Kolasib DC hovin sawiho a ni.

He sawihona Kolasib DC Conference Hall-a neih ah hian Competent Authority for Land Acquisition (CALA), DFO, NHIDCL, Vairengte, Bilkhawthlir leh N. Chhimluang Village Council bakah YMA hruaitute an tel a. Thutkhawmna ah hian leilung hausakna humhalh chunga hmasawnna hna kalpui a pawimawh thu leh inbuktawk taka kalpui a nih loh chuan harsatna lian zawk thlentu a nih theih thu sawi niin Kolasib paltlang tur 4-Lane kawng laih tur pawh hna a tak a kalpui hmain ruahmanna felfai tak siam hmasak a pawimawh thu sawi a ni. Package 3 chhungah leivung paihna hmun 8 leh Package 4 chhungah hmun 7 ruahman sa te chu sawiho niin hnathawktu tur Engineering, Procurement and Construction (EPC) chu hemi zawm chunga kalpui tur a nih angin leilung tichhe tam lo zawng a khawtlang duh dan leh a tul dan a zirin hnathawh hunah leivung paihna hmun pawh tih danglam theih tur a rel a ni.

Leivung paihna hmun tur hian NHIDCL-in ram a lak tawh pawn lam ami hman a nih chuan zangnadawmna hranpa ruahman a nih loh tur thu tarlan niin ram hawh man erawh Contractor-te nen inbiakremna anga pek tur a nih thu sawi a ni a. Chhut danin leivung zaa 50 chu kawng laih thar huamchhung hmun hrang hrang hnawh khah nan hman a nih tur thu leh zaa 50 dang chu leivung paihna hmun ah paih tur a nih thu NHIDCL lam chuan tarlangin, khawtlangin leivung hman tangkaina tur an neih chuan a remchan dan a zirin ruahmanna siam sak theih a nih bawk tur thu sawi bawk.