Vairengte-ah College thar hawn a ni

Serlui bialtu MLA Lalrinsanga chuan Zirtawpni khan Vairengte College hawngin July - December 2023 chhunga College-a thawkte hlawh tur pawh bialtu MLA hian a pe nghal bawk.

College thar hawnna hunah hian bialtu MLA Lalrinsanga chuan Mizoram-a College te hi a tirah chuan Khawtlang hruaitu leh mipui tangrualin an din atanga bul tan chhoh a nih thin thu sawiin, Vairengte khawtlang hruaitu leh mipui te tanrual na avangin Vairengte-ah pawh College thar hawn a ni thei ta chu lawmawm a tih thu leh khawtlang tana hmasawnna ropui leh mellung pawimawh tak a nih thu a sawi a. Vairengte College chu Vairengte mai bakah a chhehvel khua te tan pawha chhenfakawm a nih ngei a beisei thu a sawi bawk.

Vairengte College hi kumin 2023 Academic Session atanga tan nghal niin Govt. Saitual College Principal pension ta Dr. Lalsiamhnuna Principal na hnuaiah Teaching Faculty paruk (6) leh LDC pakhat (1) an awm mek a. Kumin July - December chhunga thawktute hlawh tur zawng zawng hi Bialtu MLA chuan tum sak vekin Computer Full Set a lo pe tawh bawk a ni. Vairengte College hi Evening Shift-a kalpui phawt tur niin Subject paruk - Education, Economics, History, English, Mizo leh Political Science-ah bul tan a ni a, College building an la neih hma chu Vairengte High School-ah Class an kal rih dawn a ni.