National Doctor's Day pualin Serchhip-ah hun hmang

Inrinni kalta July 1, 2023 kha National Doctors' Day niin he ni pual hian Serchhip-a Doctor te chuan inkhawm an huaihawt bakah Serchhip-a Home thenkhat tlawhin thilpek an hlan bawk.
National Doctors' Day pual hian Serchhip-a Doctor te chuan Inrinni chawhma lam khan Serchhip District Hospital OPD-ah District Medical Superintendent Dr. ZD. Lalmuanawma kaihhruaiin inkhawm tawi an hmang a, he hunah hian Serchhip CMO Dr. Lalzawmi chuan India ramah July 1 chu Doctor thiam hmingthang Dr. Bidhan Chandra Roy-a pianni leh a thih ni denchhenin Doctors' Day atana hman thin a nih thu sawiin, he ni a lo thlen hian mipuite pawhin Doctor te pawimawhna an hriat thar turin a chah a. Covid hri len lai pawhin mipuite an him theih nen Doctor te chuan theihtawp an chhuah thu leh nunna chan hial te pawh an awm thu sawiin, mipuite himna tura Doctor te inpekna chu hriat sak reng turin mipuite chu a sawm bawk.

Serchhip CMO chuan hetianga Doctor te an pawimawh rual hian an phena thawk Medical lama mithiam tam tak an awm bawk thu a sawi a, midangte damna tura Medical lama thawktute inpekna chu Doctors' Day alo thlen hian lo hriatpui turin mipuite chu a chah bawk.

National Doctors Day pual hian Inrinni a Serchhip District Hospital OPD-a inentir tura kal te chu theitui leh a hmeh sem vek an ni a, Ser-chhip a Doctor te hian chawhnu lamah Zoar Urban Deprived Children Home leh Beiseina In (Old Age Home) te tlawhin Indian Medical Association (IMA) hmingin pawisafai an hlan bawk.