Leivung paih avanga Zawlpui phai harsatna Serchhip Bialtu MLA in a hmunah a enpui
Serchhip Zawlpui Phai tlawhtu bialtu MLA Lalduhoma hi Serchhip Mat Phai Lumtui Zau-a FMC President C. Lalramzauva leh a thawhpui ten lo dawngsawngin, harsatna an tawh hrang hrangte an lo hrilh a, FMC hruaitute chuan Zawlpui Phai-ah hian Leilet siam thin mi 150 vel an awm thu sawiin, heng mite hian Lumtui, Tuilut leh Zawlpui lui te chu leilet siamna atan hian an hmang ber tih sawiin, Tuichar lui hmang pawh chhungkaw engemaw zat an awm thu an sawi a. Serchhip leh Keitum inkar NH. 54 laihzauh a nih hnuah hnathawktu ten leivung paihna tura ruahman ni lo-ah leivung nasa taka an paih thu leh nikum lamah pawh harsatna an lo tawk tawh tih an sawi a. Leivung paihna atan hian a tirah VC ten hmun pathum (3) phal sakin heng ah te hian paih bawk mah se kawngsir-a nawr liam mai mai te a tam avangin heng te hian an tui lakna Lumtui, Tuilut leh Zawlpui lui te chu nasa takin a rawn hnawh tawh tih an sawi a. Nikum lama harsatna an tawh bakah hian kumin hian nasa taka a rawn hnawh leh thu leh an tui lakna lian ber, Lumtui lui-ah chuan leivung hian Intake chawpa a chhilh thu leh tunah hian Intake chu haichhuakin Tuikawng a hnawh mek chu tunkar hian thenfai an tum thu leh tunah hian tuikawng-ah hian tui kal thei lo khawpa leivung rawn tawlh hian a hnawh thu an sawi a ni.
Lumtui FMC hruaitute hian leivung paihna tur an ruahman thenkhat ah hian a dawlna te siam ve bawk mah se ruahtui a tlak hnuah nasa taka chirh/tuihawk rawn liamin an Leilet panna kawng te pawh a hnawh thu leh chhungkaw pahnih te Leilet chu kumin a siam theih loh khawpin chirh in a rawn hnawh thu an sawi a, kumin hian ruahtui a la tla dawn chauh nia a lan avangin Tuikawng pawh hi thianfai mah se Fur ruahtui tlak dan a zirin buaina nasa zawk tawk thei an nih thu an sawi a. Heng harsatna an tawh ah hian kawngpui laihzauh hna thawktute pawh an dawr thin thu leh District thuneitute hnenah pawh an harsatna hi an thlen thin thu an sawi a. An tui hmuhna hnar lamah leivung nasa taka paih a nih avang hian tun dinhmunah Tui fim tha in tur pawh an nei tawh lo niin an sawi bawk a, chirh rawn tawlh hian an Leilet bakah bungrua leh hmanraw dang a tihchhiat hrang hrang te pawh Bialtu MLA hi an tlawhpui bawk a ni.
Heng hmun a tlawhna ah hian bialtu MLA Lalduhoma chuan Mizoram hmun hrang hranga NHIDCL leivung in thil a tihchhiat te zingah Serchhip bial kan tel ve thu leh a tuar pawl kan nih ve thu sawiin, leivung paihna (Spoik bank) mumal siam lova kan rama kawngpui laitute an duh duhna a leivung an paih kan phalsak a chhe zawnga a zar kan zo mek a lo nih tak thu leh pawi a tih thu a sawi a. ZPM a sawkar chuan Zawlpui phai-aa kawng lei tui kawng te ngai pawimawh in tha taka siam a nih tur thu a sawi bawk a ni.
Comments
Post a Comment