Mizoram CEO in Khawzawl District a tlawh

Mizoram Chief Electoral Officer (CEO) Madhup Vyas chuan kumin kumtawp a inthlanpui neih tur inpuahchahna kalpui chhoh meka hmalakna te endikin nimin khan Khawzawl a tlawh.

Khawzawl DC Conference Hall-a Official te a kawmnaah CEO Madhup Vyas chuan inthlan tluang taka neih a nih theih nan thawhhona tha a pawimawh thu a sawi a. Midang tihsual atanga inzirin, an tihdan tha entawn a tul, a ti a. Election Commission of India (ECI) in inkaihhruaina a siam te tha taka zawm tur leh mawhphurhna hlenchhuah kawngah inrinthulhna a awm loh nan ruahmanna tha tak siam turin Official te chu a chah a ni.

Madhup Vyas chuan kum 2018 inthlanpui-ah Tuichang Assembly Constituency-a vote tla chu Mizoram puma vote tla chawhrual aia a tlem thu tarlangin, kumin inthlanpui ah chuan vote tla a tam theih nan uar zawka inzirtirna kalpui a, a bik takin a vawi khatna atana vote thlak tur te ngaihpawimawh a tul thu a sawi bawk. Mizoeam CEO hian inthlanna atana pawimawh hmun hrang hrangte a tlawh nghal bawk a ni.