Manipur atanga raltlante chhawmdawlna la dawng lo; Vawiin ah Vehbur khawn tan tum a ni

Manipur State tualchhung buaina avanga Mizoram-a an sahimna zawnga lo lutte enkawlna sum Sawrkar laipui atangin dawn a la ni lova, Mizoram sawrkar din Executive Committee on Internally Displaced Persons of Manipur in Mizoram chuan Vawiin July 3, 2023 atang hian heng raltlan te tan hian Vehbur khawn tan an tum a ni.

Executive Committee on Internally Displaced Persons of Manipur in Mizoram-a Chairman leh Home Secretary H. Lalengmawia chuan sawrkar laipui hnenah Chief Minister Zoramthanga'n tanpuina cheng vbc. 10 a dil chu thawm engmah an la rawn neih loh thu a sawi a. Chief Minister hian May ni 23 khan sawrkar laipui-ah dilna hi a lo thehlut tawh a. Hetihlai hian Finance Department-ah Manipur atanga rawn raltlante tanpuina tur sum hi an dil mek thu leh hmuh ngei pawh an inbeisei thu sawiin, Vawiin atang hian Minister te, MLA te leh sawrkar Official-te hnen atangin Vehbur an khawn tan dawn thu a sawi a ni.

Manipur a buaina a chhuah tan, May ni 3 hnu lawk May ni 5, 2023 atang khan Zofa engemaw zat chu an sahimna zawngin Mizoram-ah an rawn tlanlut a. Tunah hian raltlan mi 12,000 vel awmin hetianga In leh lo chan emaw, luah ngam lova State danga raltlante hi sawrkar laipui chuan chhawmdawlna atan anmahni lo mikhualtu State sawrkar hnenah tanpuina sum a pe thin a. Manipur mi Mizorama awmte tan erawh chuan sawrkar in a dil hnu ni 40-ah pawh sawrkar laipui hian engmah thu thar ala nei lo a. Mizoram sawrkar aiawha Tourism Minister Robert Romawia Royte kaihhruai Official-ten June ni 16-a Delhi a Union Home Secretary Ajay Kumar Bhalla an hmuh hnu leh ani pawhin pek thuai an tum thu a sawi hnu-ah tun thlengin Delhi lam atangin thu leh hla dawn a la ni lo a ni.

Hetih lai hian ‘One Nation One Ration Card’ hnuaiah Manipur atanga Mizoram-a raltlan awmte'n Retailer atangin buhfai an lei thei tawh a. Ration Card nei lo te pawhin an Ration Card number emaw, Aadhaar Card number emaw an hriat chuan buhfai hi an la thei a. Sawrkar pawhin Supply Department kaltlangin Manipur atanga raltlante tan hian buhfai quintal 2,300 chuang a pechhuak tawh bawk a ni.