Inrukbona nia sawi thu dik lo a nih thu Police in sawi

Tun thla ni 13-a Myanmar raltlan Khai zin Wi, Siaha Vaihpi a khawsa misual in an rukbo anga thuthang chu Siaha Police leh Mara Thyutlia Py (MTP) ten an chhui hnuah leiba tam tak a neih avanga tlanbo a ni tih finfiah a ni.

Inrinni-a Siaha SP Conference Hall-a thuthar thehdarhtute an kawmna ah Siaha SP VL. Lura chuan Myanmar raltlan Khai zin Wi hi theihtawp chhuaha an chhui hnuah rukbo nilo in a chhungte nen ruahmanna fel tak siamin leiba a ngah lutuk avanga a batna ten nasa taka an dil leh an vau avangin thiam taka ruahmanna siamin Myanmar lamah a tlanbo tih a sawi a ni. Thuneitute sawi danin tunt hla ni 13 (kar hmasa Ningani) chawhma dar 11:00 vel khan  Khai zin Wi hian a thawmhnaw pack fel thlapin Auto Rickshaw in Zero an pan a, a pasal nu Suizingi chuaan thlahin a rawn hmuaktu Pik-up motor nen Zero thlen hma Tuitlawk lui piah lawkah intawkin Khai Zin Wi hi a thawmhnaw nen Motor hian kalin a nu hi chuan a kirsan leh ta a ni.

Hmun him an thleng tawh tih hriat hnuah hemi ni tlai dar 5:30 bawr hian Khai Zin Wi hi misual in kidnap in an hruai niin MTP leh Police te hriattir an ni a, MTP leh Police ten ramri Outpost te leh MTP Branch hrang hrang te hriattir nghalin zankhua leh a tuk nilenga an buaipui hnuin hetianga inbumna hmang hian lem an lo chang tih hriat a ni ta a ni.

Thuneitute sawi danin Khai Zin Wi tlanbo na chhan ber chu mi 11 hnenah cheng nuai 15 aia tlemlo theuh pawisa a ba a, anni hian ba hi an thin nasat em avang leh an vau bawk thin avangin a nunna him nan a tlanbo ta nia ngaiha ni a, a pasal hi Chapi-ah a awm nia thudawn a ni