Hachhek bialtu MLA in kuhva tawlh CM-ah thlen

Hachhek Bialtu MLA Lalrindika Ralte chuan nimin khan Chief Minister Zoramthanga chu a Office-ah hmuin, dan lova Huhva tawlhruk titawp tura hma la tura ngenna ziakin a thehlut a. Hetihlai hian Hachhek Bial Kuhva Chingtu Pawl (HBKCP) chuan tukin dar 9:00 atang hian Zamuang Police Check Post-a duty-te tha ti chak tura chhun zan zawma duty an tum thu an sawi bawk.

Chief Minister hnena lehkha a thehluh ah hian Hachhek bialtu MLA Lalrindika Ralte chuan dan bawhchhia-a Myanmar atanga kuhva tawlhrukin kuthnathawktute nasa takin harsatna a thlen tih tarlangin, hei hi Chief Minister ngei pawhin a hriat thu te, Prime Minister hnenah lehkha ziakin kuhva smuggling titawp tura hma la tura ngenna a lo siam tawh thu leh Ministry of Home Affairs, Govt. of India pawhin Mizoram Chief Secretary pawh lehkha thawnin Kuhva smuggling titawp tura hma la turin a hriattir tawh thu a tarlang bawk.

Hachhek bialtu MLA chuan Chief Minister hnenah hian a kaihhruai sawrkarin Kuhva smuggling titawp tura tihtakzeta hma a lak duh loh avangin kuhva smuggling a la kal reng tih tarlangin, “Hriatthiam a har kati tak zet a ni. Mizoram Sawrkara mipawimawhte zingah kuhva smuggler-te thawhpui tlattute an awm ni ngeia ringtu tam tak an awm pawh hi a mak lo,” a ti a. “I kaihhruai sawrkarin hma a lak that duh loh avanga kuhva chingtu te’n an ei leh bar zawnna humhim tura anmahni kutkawiha hma an lak a ngai thinte hi a lungchhiatthlak takzet,” a ti bawk. Kan kuthnathawktu ten kum tam tak thi leh thau pawlha an thawhrim rah senga Pathian malsawmna an dawn mek laia dan bawhchhetu kuhva smuggler-te avanga an thawhrim rah an seng tur nasa taka a heu chu a vanduaithlak takzet tih pawh tarlangin, “Ka bial, Hachhek Constituency chhunga mi taima, kuthnathawktu chhuanawm tak takte hi a tuar nasa berte an ni. An chaw thleng ben buaksaktu, an harsatna hriatpui duh lo leh smuggler-te thlavang hauh tlattu chu I sawrkar kaihhruai mek hi niin kei pawhin ka hmu hial tawh a ni,” a ti a. “Dan bawhchhetute hrem a, dan tha taka zawmtu mipuite humhim hi sawrkar mawhphurhna a nih avangin, Kuhva smuggling titawp tura awmze neia hma la nghal turin kuthnathawktute aiawh in ka ngen a che,” a ti bawk.

Hetihlai hian Hachhek Bial Kuhva Chingtu Pawl (HBKCP) chu niminpiah khan Kawrthah North VC House-ah thukhawmin dan phalloh kuhva tawlhruk avanga an sum hloh dan thlirin, kum 2021-ah cheng nuai 3235 hmuin kum 2022-ah cheng nuai 5000 chuang hmuhchhuah an in beisei laiin cheng nuai 2000 chuang an hloh niin an chhut a. Kumin ah kuhva rah tharchhuah hralhna kawngah harsatna an neih lohna turin dan lova kuha tawlh te danchah a nih theih nan Zamuang Police Check Post behchhanna duty ve relin khaw hrang hrangte darkar 24 zel Vawiin atang hian a inchhawkin an duty dawn a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar