Dr. R. Lalthangliana’n Mizoram-a hmalakna tur chungchangah sawrkar laipui hotute a dawr

Commerce & Industries changtu Minister Dr. R. Lalthangliana chuan nimin khan sawrkar laipui-a mi pawimawh thenkhat te kawmin Mizoram-a hmalakna tur hrang hrang a sawipui.

Dr. R. Lalthangliana hian nimin chawhma lam khan Ministry of Home Affairs hnuaia Department of Border Management-a Secretary Atal Dulloo, IAS chu a Pisa-ah kawmin Kawrpuichhuah-a Integrated Check Post (ICP) tihpuitlinna tur a sum ruahman tawh cheng vbc. 552 chu central Cabinet pawmpui tura chhawpchhuak thuai turin a nawr a, Atal Dulloo chuan kar hnih vel chiah tuna a hna hi a la thawh avangin a la thar deuh thu Minister hi lo hrilhin, uluk taka a lo zirchian tur thu leh a theih anga ranga lo bawhzui a tum thu in a lo chhang a ni. He hunah hian Dr. R. Lalthangliana chuan India leh Myanmar insumdawn tawnna hmunpui Land Custom Station (LCS) Zokhawthar leh Zorinpui chu India ram-a LCS project 20 thlan zinga tel a nih avangin a pawimawh hle tih a sawi a, Border Management Secretary hnenah hian hemi atana Detailed Project Report (DPR) siam chu tih thuai a ngai tih a sawi bakah a rang thei ang bera buaipui turin a ngen a, theihtawp chhuaha lo enzui a tum thu in a lo chhang bawk a ni.

Hemi hnu hian Minister Dr R. Lalthangliana leh Rajya Sabha MP K. Vanlalvena te chuan Border Roads Organization (BRO) Director General Rajeev Chaudhary chu a Pisa-ah kawm bawkin Lunglei leh Lawngtlai District inkalpawhna atana pawimawh tak Tuipui ‘D’ Darzo kai Lei dawhna tur cheng vbc. 91 chuang saction awm tawh chungchang an sawipui a, BRO Director General Rajeev Chaudhary hian a tul ang angte an buaipui fel tawh thu leh thuneitu sang lamah an thlen mek thu sawiin, thla thar August kar hmasa ber a ralhma in engkim an tihfel theih a inrin thu a lo hrilh bawk a ni.

C&I Minister Dr. R. Lalthangliana hian Thingsai - Pangkhua inkalpawhna Defence Road BRO hovin an laih mek chu kilometre 21.38 hmabak a la awm thu pawh a thlen nghal a, Rajeev Chaudhary hian National Highway Single Lane angin an chhunzawm tur thu leh hemi atan hian Ministry of Defence chuan cheng vbc. 111 a ruahman tawh thu lo sawiin, thla 6 chhungin DPR peihfel tum a nih thu leh Working Season tharah hna thawh tan hman tumin an inruahman tih a lo sawi a ni

Dr. R. Lalthangliana hi New Delhi-ah la cham mekin ruahman lawk ang chuan Vawiin hian Asian Development Bank (ADB) hotute leh Ministry of Human Resources Development (MHRD) hotute a dawr leh dawn a ni.