Assembly Secretariat-a hna lak sut leh phutin zirlai ten punkhawm neih leh an tum

Mizoram Legislative Assembly Secretariat hna lak dan duh lovin nimin khan Aizawl-a Assembly House kawt-ah MZP, MSU, Hnampual Zirlai Pawl leh College SU-te bultumin zirlaite an pungkhawm a, hemi chungchang hi nimin khan Chief Minister hovin sawiho ni mah se karleh Thawhtanni khian lungawi lohna lantira punkhawm leh tum a ni.

Mizoram Legislative Assembly Secretariat in an hnuaia thawktu tur LDC 8 bakah Assistant, UDC leh Translator mi pakhat theuh, an vaiin mi 11 an lak danah thil fello leh chhungkhat laina hnai leh vua leh vang induhsakna nasa tak a awm nia an hriat avanga zirlai pawl ten heng hnathawktu lakna lo siam tawh chu sut leh an phutna kal zelah sawrkar lam atanga thu lawmawm an dawn loh avangin nimin zing khan Aizawl-a Assembly House kawt-ah zirlai thahnem tak an pungkhawm a, he huna tel zirlaite hian thuziak chi hrang hrang kengin Cchhungte induhsakna tihtawp an duh thu te, langtlang taka sawrkar hna lak an duh thu te, sawrkar hna zawng mekte ti beidawng zawnga hna lak an duh loh thu leh thuziak hrang hrang an keng a. He hunah hian Zirlai Pawl hruaitute chuan tunhnaia Assembly Secretariat in hna a lak 11 zinga mi 9 te chu Assembly Secretariat hotute vua leh vang an ni tih sawiin, dik lo leh fello tak, induhsakna uchuak taka hnalak chu thuneituten an cancel lo a nih chuan Assembly Secretariat luhchhuah thlenga hmalak an tum thu an sawi a. Kum 2001-ah USA in chhiatna rapthlak 9/11 a tuar tih sawiin, chumi ang chuan tun hunah pawh Assembly Secretariat-ah 9/11 a thleng niin an sawi bawk.

He huna pungkhawm zirlaite hian ‘Mizoram Legislative Assembly Secretariat hna lak hi cancel ni rawh se,’ tih te; ‘Mizoram Legislative Assembly Secretariat Recruitment Rules thar hnuaiah hna lak that ni rawh se’ tih leh ‘Mizoram Legislative Assembly Secretariat hna lak hi cancel a nih hma chuan hmalakna chhunzawm zel ni rawh se,’ tih te chu Resolution siamin an pass a, hemi hnu hian an tin darh a ni.

Hemi hnu nimin chawhnu lam khan Mizo Zirlai Pawl (MZP) leh Mizo Student’s Union (MSU) hruaitute chuan Chief Minister Zoram-thanga chu a Pisa-ah hmuin tunhnaia Assembly House a hna lak chungchangah lungawilohna an neih te thlenin, heng bakah hian an Recruitment Rules (1995) chu a hlui tawh avangin ennawn ngai nia an hriat thu te an thlen bawkin ziaka thu thlen a bawhzui an tum thu an sawi a. Chief Minister chuan inhawng takin an thu thlen te a ngaih-thlak sak a. Assembly lama hotute pawh a lo biak tur thu hrilhin a tul anga hma lak a nih zel tur thu a sawi bawk a ni.

Chief Minister hova thutkhawm an neih hnu nimin tlai dar 3:00 khan Aizawl-a MZP Conference Hall-ah Zirlai pawl te hian thutkhawm nei leh nghalin hmalak zel dan tur an sawiho a. An hmalakna ah hian tha thlah lova hmalak zel tum a nih thu leh Zirlai pawl duh dan anga he hna lak hi cancel a nih hma chuan lungawi lohna hi lantir chhunzawm zel tum a nih thu thuchhuah siama tarlangin, “Kawng zawh leh Total Bandh thlenga hmalak tum a ni,” an ti a. July 10, 2023 (Thawhtanni) zing dar 8:30 hian Assembly House kawt-ah punkhawm leh relin, Zirlaite leh thalai hna zawng mekte kim kala kal turin an sawm bawk a ni.

Heng Zirlai pawl pahnih ten nimin tlai-a thuchhuah intawm an siam atanga a lan danin tunhnaia thawktu lak thar 11 zinga 9 te chu Speaker leh Commissioner & Secretary te vua leh vangte an ni a. Translator pakhat an lak chu Assembly Commissioner hlui fanu niin Assistant mi pakhat chu Speaker monu a ni a, UDC mi pakhat chu Commissioner & Secretary nilai fapa niin LDC tura lak zingah hian Speaker PS nau, Speaker fanu, Speaker PA nilai, Speaker thianpa fanu, Speaker tunu leh Speaker Campaigner te an tel thu an tarlang tel bawk a ni.

Comments

Popular News (Last 30 Days)

LPG man bithliah thar