AMC Multi Complex hawng

Aizawl Municipal Corporation (AMC)-in cheng vbc. 10.59 senga a sak AMC Multi Complex Tuikual South Building chu niminpiah khan Aizawl Mayor Lalrinenga Sailo chuan a hawng a, Aizawl Mayor chuan kum 2015-a Corporation a AMC hlankai a nih hnuah AMC in chak takin assets siam tura hma a lak thu leh, hotu hmasate hmalakna a chhuanawm thu a sawi a. AMC chu mahni a inchawm thei tura tih a nih avangin Central Sawrkar atanga a sum dawn a tlem telh telh thu leh sum (revenue) lut thei thil rotling (asset) siam turin theihtawp a chhuah zel a tul thu a sawi bawk. AMC Multi Complex Tuikual South-ah hian kir-thei dahna hmun bakah thil zawrhna leh Hall te pawh a awm a, Assembly House bul kawngsira inpho thinte nuam zawka an thut theihna tura ruahman a ni.