Serchhip District Police Crime Review Meeting neih a ni; Kumin ah rukruk kaihhnawih thubuai ziahluh a tam

Serchhip District Police te chuan kumin chhungin thubuai chi hrang hrang 59 ziaklut tawhin heng atang hian thubuai 39 te chu chhui zo tawhin Court-ah Chargesheet an thehlut tawh a. Kumin chhunga thubuai an ziahluh ah hian rukruk leh a kaihhnawih thubuai chu a tam fal hle a ni.

Serchhip District Police te hian nimin khan Serchhip SP Vanlalnghenga hovin Serchhip SP Conference Hall-ah Serchhip District Crime Review Meeting neiin kumin chhunga Serchhip District-a thubuai ziahluh an neih tawh dan leh heng thubuai hrang hrangte bawhzui a nih dan an thlirho a. He hunah hian Serchhip SP chuan kumin chhunga Serchhip District chhunga Police ten thubuai an ziahluh dan leh an chinfel zat te tarlangin, “Keimahni avangin nu nau leh chak lo zawk te thlamuang takin an awm theih phah a ni tih hriain kan hnathawh ah theihtawp kan chhuah zel a ngai a ni,” a ti a. Police Department-ah Training an awm ve fo thin avang te, hriselna that loh avanga hna thawk hlei thei lo leh chhan dang dang avangin hmun ruak a tam thu pawh sawiin, hei vang hian hna thawktute chuan an theihtawp an chhuah thin a tul thu leh chumi atan chuan an hriselna pawh uluk taka an vawn tlan a pawimawh thu sawiin he huna kalkhawmte chu a fuih a ni.

He hunah hian kumin (2023) kumtir atanga nimin (June 8, 2023) chhunga Serchhip District chhunga thubuai dinhmun tarlan niin kumin chhung hian Serchhip District-ah thubuai 59 ziahluh ni tawhin Serchhip Police Station-ah 35, Thenzawl Police Station-ah 17 leh North Vanlaiphai Police Station-ah 7 te an ni a. Heng atang hian thubuai 39 te chu chhui zo tawhin Court-ah Chargesheet thehluh a ni tawh a, thubuai 10-ah Court in thuremna siamin conviction a awm tawh a. Thubuai ziahluh 59 atang hian mi 69 man an awm bawk a ni.

Kumin chhunga thubuai ziahluh 59 zingah hian mi rawk leh rukruk thubuai 41 zet a awm a, tualthah thubuai pahnih a awm bakah kangmei kaihhnawih te, Hmeichhe chunga mawi lo taka chetna leh mi tihnat/tihthaih kawngah thubuai 2 theuh ziahluh a ni bawk a. Jail tang tlanchhuak, intihhmingchhiat, Motor chetsualna (nunna chan awm leh awm lo), ralthuam kaihhnawih, MLP Act leh ND&PS Act bakah thildang thenkhat ah thubuai pakhat theuh ziahluh a awm a, POCSO Act hnuaiah thubuai ziahluh a awm lo thung a ni.

Nimin-a he hun hmanna ah hian thubuai chinfel loha la awm te chinfel ran theih dan tur hrang hrangte sawiho a ni.