Serchhip District-ah Integrated Health Campaign nei dawn

Mizoram State AIDS Control Society (MSACS) hmalakna in thla thar July 2023 khian Serchhip District-ah Integrated Health Campaign neih a ni dawn a, hemi atana hmalak dan tur sawihona hi nimin khan Serchhip CMO Conference Hall-ah neih a ni.

He sawihona kai-hruaitu Mizoram State AIDS Control Society-a Project Director Dr. Lalthlengliani chuan Integrated Health Campaign neih tur chungchang hi sawifiahin, National AIDS Control Orga-nisation (NACO) atangin Mizoram pumah Prison & Other Closed Settings chu June thla chhung hian Home leh Jail-ah te neih mek a nih thu sawiin, STI, HIV, TB leh Hepatitis laka beihpui thlakna a nih thu a sawi a. Hemi hnu July thla khian Serchhip District-ah Integrated Health Campaign hi neih a nih dawn thu leh he hunah hian District chhunga khua zawng zawng tlawh-chhuakin mipuite chu HIV, STI, Hepatitis B leh C bakah TB te a thlawna test an nih dawn thu a sawi a. Heng Test man hi a thlawn vek a nih dawn thu leh kum 15-49 te chu tinzawn an nih dawn thu a sawi. Serchhip District chu ram laili leh Aizawl atang pawha vil awlsam tur a nih avangin a bultanna atan hman a nih thu leh District dangah pawh la tih zel tur a nih thu a sawi bawk a ni.

Nimin-a he hun hmanna ah hian Aizawl atangin MSACS-a hotu pawimawh te an rawn tel tha hle a, Serchhip-a Health Department hnuai thawktu hrang hrang telin Integrated Health Campaign neihna tur atana ruahmanna siam ngai hrang hrang te sawiho a ni.