Serchhip District-ah World No Tobacco Day hmangin a thlawna inentirna buatsaih a ni

Nimin May 31, 2023 khan khawvel hmun hrang hrangah Vaihlo leh a kaihhnawih hrang hrang dona ni, ‘World No Tobacco Day 2023’ hman niin Serchhip District-ah pawh National Tobacco Control Programme (NTCP) Serchhip District buatsaihin North Mualcheng khua ah hun hman a ni a, a thlawna inentirna buatsaih nghal a ni bawk.

World No Tobacco Day 2023 puala inkhawm Mualcheng Community Hall-a neih hi Serchhip SMO leh NTCP-a District Nodal Officer Dr. Lallawmkimi Chhakchhuak chuan hmanpuiin Vaihlo hman in kan taksa-a nghawng a neih theih hrang hrangte a tarlang a. Chutihrual chuan zuk leh hmuam ti ve lem leh hmang ngai ve lem lo, Vaihlo chingtute chuan Vaihlo an chin te an sawngbawlna avangin an taksa ah harsatna an tawh theih thu a sawi a. “Eizawnna dang kan in siam sak theih loh avangin vaihlo ching lo tura rawn ti ringawt theih kan nih loh rualin vaihlo Tur laka kan lo him theih nan vaihlo kan sawngbawl laiin Mask te kan hren a, kutbawr te kan bun thin a pawimawh a ni,” a ti a. Vaihlo chingtu kalkhawmte hnenah Kutkawr leh hmai tuamna (Face mask) a sem nghal bawk a ni.


Nimin-a he hun hman hi NTCP-a District Consultant K. Hmingthansangi chuan kaihruaiin Food Safety and Standards Authority of India (FSSA) Dan hnuaia man Gutkha product te chu Dr. Lallawmkimi Chhakchhuak leh Dr. Lalruatliana Pachuan (Medical Officer) ten Tui-a leih in an tichhia a. Tun tumah hian Shikhar Gutkha pocket 1239 leh a pawlh chi SS-One pocket 956 tihchhiat a ni.

World No Tobacco Day puala inkhawm neih zawh a nih hnu hian Mualcheng Community Hall-ah hian a duh apiang tan a thlawna inentirna buatsaih zui nghal niin Dr. Lallawmkimi Chhakchhuak, Dr. Lalruatliana Pachuau (Surgeon) leh Dr. H. Lalengzauva (Dental Surgeon) ten damlo te an en a. General-ah mi 121 leh Dental-ah 50 inentirin Zuk leh hmuam nghei duh te tan Tobacco Cessation Clinic (TCC) mi 28 in an pan bawk.


Kumin-a World No Tobacco Day-ah hian 'Eitur hrisel ching rawh, Vaihlo ni lovin' (Grow Food, Not Tobacco) tih chu thupui-ah hman a ni a. Mithiam te sawi danin khawvel pumah kum tin vaihlo leh a kaihhnawih avangin mi maktaduai 8 chuang an boral a, Mizoram mipui kum 13-15 inkar zingah zuk leh hmuam ti za zela 58 awmin leh kum 15 chunglam zinga za zela 58.7 an awm bawk a, sim tum za zela 20 ten an sim thei a. Thla khat chhungin meizial lei nan cheng nuai 918.94 vel sengral zel anga chhut a ni bawk.

Comments

Popular News (Last 30 Days)

LPG man bithliah thar