Serchhip-ah Mathematics tihlarna hun hmang
Govt. Serchhip College-a Department of Mathematics leh Mizoram Science, Technology & Innovation Council tangkawp buatsaiha BNRGSK Hall-a he hun hman hi Chief Scientific Officer leh MISTIC-a Member Secretary Er. H. Lalsawm-liana chuan rawn hmanpuiin Mathematics thiam hmingthang Srinivasa Ramanujan piancham Dec. ni 22-ah kumtin National Mathematics Day hi hman thin a nih thu leh hemi puala tuna hun an hman chu hriatna zau zawk an neih theihna tura tangkai taka hmang turin zirlai kalkhawmte chu a chah a. Mizote UPSC Exam-ah kan hming a lan ve theihloh avangin kan lungphang deuh nia a lan thu pawh sawiin, Zirlai kalkhawmte chu nakin huna Mizoram hmachhuan tur an la nih dawn thu leh tih tak takna nena bei turin a fuih a, Mathematics thiam bikte chu hna zawn kawngah an tan kawng a in hawn zau bik thu sawiin, hlawhtling tur chuan thiam filawr nih leh tum nei a lehkha zir a pawimawh thu a sawi bawk.
Nimin-a he hun hmanna ah hian chawhma lamah Dr. Davy Lalruatliana, Senior Scientific Officer leh Coordinator National Mathematics Day chuan he ni an hman chhan leh an hman dan te a tarlang a, Dr. Lalhmangaihzuala, Department of Mathematics, Govt. Serchhip College chuan 'Mathematics Popularisation' tih thupui a hmangin thu a sawi bawk.
Chawhnu lamah ‘Fun Mathematics’ tih thupui hmangin Andrew Lalchullova chuan thu sawiin Mathematics Olympiad thlanna neih a ni a. A pumpui-ah Lalenkawli (Govt. Serchhip H/S) chu pakhatna niin Rs. 2000/- a dawng a, Lalhma-ngaihzuala (Govt. Serchhip H/S) chu pahnihna niin Rs. 1500/- a dawn bakah pathumna J. Vanlalhlui (Govt. PCR H/S) chuan Rs. 1000/- a dawng bawk a, mi 10 hnenah Consolation Prize pek an ni.
Comments
Post a Comment