Sawrkar in MR te hlawh tur a tipung

Mizoram Sawrkar chuan Department hrang hranga Muster Roll (MR) te hlawh thar tur a siam a, hlawh hman mek aiin a pung a ni.

Labour Employment, Skills Development & Entrepreneurship Secretary chuan MR-te hlawh thar chungchang ah hian nimin khan Notification ti chhuakin, hlawh thar hi ni 18.5.2023-a Council of Minister thukhawmin an pawmpui anga ruahman a nih thu a tarlang a. MR-te hlawh thar tur hi ni 1.4.2023 atanga hman tan tur anga tihchhuah niin Notification tihchhuah hun hi ni 16.6.2023 a nih tawh avangin MR-te hian April leh May hlawh punna chu arrear-in an la ang.

MR-te hnathawh hun chhung tur chu ni khatah darkar 8 niin, Office-a awmte chu an hotute hun bituk zat ang an thawk anga. H la tho siin kum khatah ni 11 (a ni bituk sa) chawlh an nei ang.

Hlawh thar ruahman ang chuan Casual/Muster Roll Employees te chuan ni khat zelah UnSkilled in Rs. 420/-, Semi Skilled in Rs. 460/-; Skilled-II in Rs. 570.- leh Skilled-I in Rs. 730/- an hlawh anga. Hei hi Roads & Building Operations leh Registered Factories-a thawk ten an hmang dawn bawk a, Public Motor Transport Employees te chuan ni khat zelah UnSkilled in Rs. 380/-, Semi Skilled in Rs. 420/-; Skilled-II in Rs. 460.- leh Skilled-I in Rs. 510/- an hlawh ang

Comments

Popular News (Last 30 Days)

Bawngchawm tlang khualbuk rawktu nia hriat mi 2 man