Sahimna zawng lut pung zel

Manipur State buaina avanga sahimna zawnga Mizoram-a rawn lut chu an la pung zel a, Serchhip District-ah pawh nimin khan mi 3 rawn lut lehin he buaina avanga Serchhip District-a rawn lut hi mi 50 an tling ta a ni.

Nimin-a Serchhip District-a rawn lut ziahluh thar te hi Game Village, Imphal West atanga rawn lut niin Thenzawl West-ah an awm a, heti hian chhinchhiah chinah Manipur atanga raltlan rawn lut hi Thenzawl East-ah mi 27 awmin New Serchhip South-ah 9, P&E Veng leh Serchhip Kawnpui-ah 4 ve ve leh Darnam leh Thenzawl West-ah mi 3 ve ve an awm a ni.

Manipur buaina avanga nimin thlenga Mizoram-a raltlan rawn lut hi mi 8658 an tling tawh a, Kolasib District-ah tam berin 3128 an awm a, Aizawl District-ah 2807, Saitual District-ah 2282 te chu an rawn luh tam zualna niin Champhai District-ah 109 an awm a, District dang 5-ah mi za aia tlem an awm bawk a ni.