Mizoram-ah E-PMSMA hawnna neih a ni

Nimin khan Aizawl-ah ‘Extended Pradhan Mantri Surakshit Matritva Abhiyan. (E-PMSMA) hawnna neih a ni.

E-PMSMA hi Health Department-a Principal Secretary Esther Lal Ruatkimi chuan Civil Hospital Aizawl-a OPD Building-ah hawngin PMSMA chu tha thawkhat viau mah se a aia changtlung zawk ‘E-PMSMA’ chu sawrkar in a duang chhuak tih tarlangin, hei hian nu naupai tan zau zawkin hamthatna a kengtel dawn tih a sawi a. Sawrkar laipui leh Mizoram sawrkarin hriselna a ngaipawimawh hle tih pawh sawiin, a bik takin nu naupaite tan hamthatna tam tak a siam thin thu leh E-PMSMA pawh hi hemi kawnga sawrkar hmalakna pawimawh tak a nih thu a sawi bawk a ni.

E-PMSMA chu nu naupai ten tha leh tluang taka nau hrisel tak an neih theihna tur a nih thu Principal Secretary chuan sawiin, nu in nau hrisel tak a neih theih sawrkar in a ngaih pawimawh awngin naupaite chu an dikna chanvo hre tur leh inthlahrung lo turin a chah a, sawrkar in a thlawna naupaite tan hamthatna a siam te chu tangkai tak a hmang turin a chah bawk.

Kum 2016 khan PMSMA hi din lo ni tawhin National Health Mission (NHM) hnuaia Reproductive and Child Health (RCH) chuan an kalpui a. PMSMA-ah hian nu naupai mek ten an rai laiin vawi 4 an inentir ngei ngei tur zingah Doctor ngeiin vawi khat tal en tura ruahman a ni a, thlatin ni 9-ah sawrkar damdawi In tinah a thlawnin naupaite chu en thin an ni bawk a, test hrang hrangte chu a thlawn emaw, senso tlem thei ang berin lo tihsak thin an ni. Extended PMSMA-ah hian naupai a bik taka enkawl ngai (High Risk Pregnancy) hmuhchhuah an nih chuan vawi khat mai ni lovin vawi thum thlengin inentir theih a ni dawn a, chu bakah thlatin ni 9-a in entir hman lo te tan pawh nidang siam a ni dawn a ni.