Mizoram lui tui zirchian dan tur sawiho

Governor Dr. Hari Babu Kambhampati chuan nimin khan P&E Department hotute leh Central Water Commission (CWC) hotute te kawmin Mizoram-a lui luang atanga Kawlphetha siamchhuah theih zat dik tak a rang lama zirchian dan tur a sawipui.

Governor hian Raj Bhavan-ah Mizoram sawrkar-a P&E Department hotute leh Central Water Commission (CWC), Ministry of Jal Shakti hotute hi kawmin Mizoram a Kawlphetha siamchhuah chungchangah Prime Minister a hmuh tawh thu a sawi a. Prime Minister in hemi chungchang hi tha taka a lo ngaihthlak thu sawiin, hun remchang hmasaah P&E, Govt. of Mizoram ten Prime Minister Office (PMO)-ah Presentation an pek a lo remtih sak thu a sawi a ni.

Governor chuan Mizoram Sawrkarin PMO a Presentation an pek hmain Kawlphetha kan tharchhuah theih zat chiang zawka zirchian a ngai tih sawiin, Survey & Investigation hi CWC leh P&E ten an neih tawh angin Statistics neih a ngai nia a hriat thu a sawi a. Statistics inang khat leh rintlak a rang lama neih a nih theih nan CWC leh P&E te chu information an neih ang te inpe tawna, thawkho turin a chah a. Presentation atana proposal siam a nih dawnin Central Electricity Authority of India te nena sawihona neih hmasak bakah an ngaihdan te lak hmasak pawh tha a tih thu a sawi bawk.

Nimin-a inkawmna hunah hian CWC Team lamin an thil zirchianna neih atangin PowerPoint presentation an pe hmasa a. Hemi hnu hian tun dinhmuna an thil hriat dan leh hmalakna kalpui tawh chi te P&E official lam ten an sawi leh a. CWC leh P&E te report pekna eng atang hian thawhho dan tur leh hmalak zel dan tur te sawi chhunzawm nghal a ni a. Raj Bhavan-a Meeting an neih zawhah CWC Official te hian P&E Department-a E-in-C Er. Lalhmingliani Hmar an kawm chhunzawm nghal bawk a ni.