Hmeichhiate dinhmun chawikang tur hian a hmei a pa in kan pawimawh - SW&TA Minister

Social Welfare & Tribal Affairs Department changtu Minister Er. Lalrinawma chuan, “Hmeichhiate dinhmun chawikang tur hian a hmei a pa in kan pawimawh a ni,” a ti.

Hmeichhia ten hleilenna an tawrhna laka venhimna leh chhawmdawlna tura hmalakna, Mission Shakti khuhhawnna nimin-a ATI Auditorium Aizawl-a neih ah Social Welfare Minister Er. Lalrinawma chuan hmeichhiate dinhmun chawikang tur hian a hmei a pa in kan pawimawh thu leh an chanvo chang thei tura dawmkan leh rahbi siamsak hi kan tih makmawh a nih thu a sawi a. Sawrkar laipuiin hmeichhe dinhmun a ngaih pawimawh em avangin Scheme tha tak tak kalpui mek a nih thu sawiin, “Tuna Mission Shakti pawh hian hmeichhiaten hleilenna an tawrhna lakah nasa takin venhimna leh chhawmdawlna a pe dawn a ni,” a ti a. He Programme hlawhtlinna atan hian Department hruaitu leh Staff-te chu theihtawp chhuah turin a fuih bawk a ni.

Mission Shakti hnuaiah hian State Level-ah State Hub for Empowerment of Women (SHEW) awmin, District tinah District Hub for Empowerment of Women (DHEW) te an awm bawk a. Hei bakah hian hmeichhia harsatna tawkten phone hmanga an harsatna an thlen theihna tur Universal Women Helpline (WHL) chu englai pawhin an duty a, anni hian an hnena harsatna thlentute chu an mamawhna zawn zela tanpui thei turin an lo in hawng thin a ni. Heng bakah hian District tinah hmeichhia tanpui ngaite leh harsatna tawkte tan tluk luhna tur One Stop Centre (OSC) leh hmeichhe baihvai leh hleihlenna tawkte inhumhimna tur Shakti Sadan (Swadhar Greh Home) chu englai pawhin an inhawng reng a. Hmeichhia leh naupang tanpui ngaite tan Phone number 181 leh 1098-ah te engtik lai pawhin phone theih reng ni bawkin heng hmun te hi mi tam takin an hmang tangkai tawh bawk a ni.

Nimin-a Mission Shakti khuhhawnna hi Addl. Secretary, SW&TA Department Donnie chuan kaihruaiin Women and Child Development Department-a Director Zoramthangi Chhangte chuanMission Shakti pawimawhna leh Mizoram chhunga kalpui dan turte a tarlang a, he hunah hian tunhnaia HSSLC result chhuaka hmeichhe Topper-te hnenah lawmpuina thuziak hlan nghal an ni bawk.