Governor in NIELIT hotute an hmalakna a sawipui

Mizoram Governor Dr. Hari Babu Kambhampati chuan National Institute of Electronics & Information Technology (NIELIT), Aizawl hotute nimin khan kawmin NIELIT in Mizoram chhunga an hmalakna leh an thlen chin te a zawh bakah changtlung zawka kalpui dan turte a sawipui.

Raj Bhavan-a an inkawmna ah hian Governor chuan Computer thiam pawimawh tak zia te, eng hna pawh thawk dawn ila Computer thiam a ngai deuh vek tawh nia a lan thu te bakah IT Literacy ah tan lak a ngaih thu te a sawi a. Central Sawrkar hnuaia din, a zirna pawh Central sawrkar duhdan thlapa duan NIELIT hnuaia Computer thiamna zir chu State chhung leh pawna hna zawng tur tana thil pawimawh tak a ni tih a sawi a. NIELIT, Aizawl leh Lunglei Centre hna thawh dan leh an harsatna tawh te a zawt bawk a ni.

He hunah hian NIELIT, Aizawl-a Director Incharge T. Gunendra Singh leh a thawh-puite chuan PowerPoint presentation hmangin NIELIT hmalakna, thlenchin, hmachhawp leh an harsatna te an sawifiah a. Governor chuan NIELIT in Computer leh a kaihhnawih thil zirtirna hrang hrang a kalpui te chu a tha thawkhat nia a hriat thu a sawi a. Theihtawp chhuah chhunzawm turin a chah bawk. NIELIT atang diploma nei ten Mizoram Sawrkar hnuaiah LDC hna an dil ve thei lo lai chu lo zirchian a, sawrkar thuneitute sawipui a tum thu a sawi a. Central Sawrkar lama NIELIT mamawh te pawh a tul angin Ministry of Electronics & Information Technology, Govt. of India thuneitute hnenah bawhzui sak a inhuam thu a sawi bawk.

NIELIT hnuaiah hian Course hrang hrangah zirlai 3000 bawr vel kum khat chhungin ziahluh thin an ni a. Hmeichhe Hostel mi 51 awm theihna leh mi 82 awm theihna Mipa Hostel an nei mek a ni. NIELIT hnuaia zirna hi chi thum – Formal, Non-Formal leh Short Term Course anga kalpui a ni bawk.