Golf Course-a sum hmuh aiin a enkawlna senso a tam

Thenzawl-a Golf Course atanga sum lakluh aiin a enkawlna senso a tam zawk rih a, ramdang atanga Golf khel tura lo kal mi pakhat chauh a la awm bawk.
Thenzawl Golf Course hi Zirtawpni leh Inrinni khan Mizoram Journalist Association (MJA) Member thenkhat ten tlawhin a dinhmun an zirchiang a, thawktute sawi danin, Golf Course enkawl nan hian a lo berah thla khatah cheng nuai 5 atanga nuai 7 vel sen a ngai a, Golf Course atanga sum lakluh chu thla khatah cheng nuai 2 atanga nuai 5 vel a ni thung a. A luh man pangngai aia man tlem zawka luh theih hun an siamah sum lut hi a tam ve deuh thin a, COVID-19 hri leng ziaawm hnua an hawn tirh khan thla khatah cheng nuai 7 vel an lalut a, boruak a that chhoh zel hnuah tlawhtu hi awm ve reng mah se, sum lut hian a enkawlna senso a phuhru zo lo thin a ni.


Golf Course-ah hian khualzin tana riah theihna (Eco-Log Huts) Room 30 siam a ni a, heng Room te hi a khah vek chang awm bawk mah se, hun tam zawkah chuan a khat lo tlangpui a. Golf khelhna phul chu a tira a la rualtu tur balu dah bak dah belh a nih loh avangin khawl hmanga tihrual thei a ni tawh lo a, a enkawlna dan tur dik taka enkawl theih a nih tawh lo bawk a ni. Thenzawl Golf Course-ah hian Bangladesh atangin Golf khel tura mi pakhat lo kal bak Golf khel tura ramdang atanga lo kal an la awm lo a ni.

Golf Course-a mikhual thlenna Room leh Cafeteria bakah In sakna atana hman Thing te chu a mawih chhia hmuh tur a awm nual tawh a, heng thing mawih thawmtha tur hian an thing hman ang hi Mizoram-ah a awm loh avangin a mawih chhe lai te hi thawmthat lohin a awm a ni.

Thenzawl Golf Course & Resort hi acres 105 zet-a zau niin Aug. 4, 2020 khan hawn niin helai hmun tlawhtu zingah hian Aizawl mi an tam ber a, Mizoram hmun hrang hrang atanga tlawhtu zingah Lunglei, Champhai leh Kolasib District atanga tlawhtute pawh an awm a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar