Central YMA in Raltlan tan Transit Camp siam rel

Central YMA chuan Manipur tualchhung buaina avanga sahimna zawnga Mizoram-a rawn raltlante tan Aizawl-a Central YMA Hall chu Transit Camp atan buatsaih nise an ti.

Zirtawpni zan-a Central YMA Central Executive Committee (CEC) thukhawm chuan tunhnaia Manipur tualchhung buaina avanga harsatna tawk, nunau mangang Mizoram-a sahimna zawnga rawn raltlan te chungchang hi ngaihtuahin mi engemaw zat in Mizoram an rawn luh tawh thu leh an la rawn luh belh zel thu tarlan a ni a. Chhung leh khat belh tur nei lo, baihvai taka lo thengte tan Sawrkar in ruahmanna mumal a siamfel hma chu Aizawl a Central YMA Hall chu Transit Camp-ah buatsaih nise a ti a. A lo dawnsawn kawngah mawhphurtu tur CEC Member atangin ruat nghal a ni a, heng Mobile No. 9862162361 leh 8132841290-ah hian in hriattir theih a ni anga. Raltlan dawnsawn kawngah hian Central YMA Hall a leng lo tan Aizawl khawpui chhung Branch YMA thenkhatte pawh a tul anga lo inring turin Central YMA chuan a ngen a ni.

Central YMA chuan Manipur buaina hi a reh thuai theih nan leh boruak muanawm a thlen vat a duh thu pawh sawiin, Mizoram Sawrkar pawh raltlante dawnsawn kawngah tun aia chak zawka hma la turin a ngen bawk.

Sawrkar in a chhinchhiahna atanga a lan danin Manipur buaina avanga sahimna zawnga Mizoram-a rawn raltlan hi Inrinni thleng khan mi 8878 an tling tawh a, Kolasib District-ah mi 3266 lutin Aizawl District-ah 2889, Saitual District-ah 2249, Champhai District-ah 232, Khaw-zawl District-ah 77, Lunglei District-ah 63, Ser-chhip District-ah 50, Mamit District-ah 33, Siaha District-ah 11 leh Hnahthial District-ah mi 6 an lut tawh a, Lawngtlai District tihloh District dang zawngah raltlan hi an lut tawh a ni.