Bawngpui kahrai zirhona nei

Bawnglian kharai inzirtirna ni hnih awh tur chu nimin khan Serchhip-a Vety Training Hall-ah neih tan a ni.
National Artificial Insemination Programme (NAIP) hnuaia he Training neih hi Serchhip DVO Dr. R. Lalmakthanga chuan hmanpuiin Bawnghnute tharchhuah atanga sum hmuh chu India ram sum hmuhna pawimawh tak a nih avangin India sawrkar pawhin a ngaih pawimawh thu leh Bawnghnute tam zawk thar-chhuah a nih theih nan programme lian tak tak pahnih kalpui mek a nih thu a sawi a. Hemi hnuaiah hian Bawng chi tha thehdarh a nih theih nan Artificial Insemination hmangin ramchhung hmun kilkhawr zawkah pawh Bawng chi tha hi thehdarh a nih thu sawiin, chumi atana hmalakna atan he Training hi buatsaih a nih thu a sawi a ni.

Ni 2 awh tur he Training-ah hian nimin khan AH&Vety Department hnuaia Artificial Insemination-a thawktute tan hun hman niin VFS leh VFA te an tel a, Vawiin hian Serchhip District-a Bawnglian vulhtute tan training neih leh a ni dawn a, AH&Vety Department-a Deputy Director (F&FD) Dr. Lalhmangaiha chuan zirtirna a pe a. Vawiin hian Bawngpui kah rai a taka tihchhinna neih nghal tur a ni ang.

Tun dinhmunah Serchhip District-ah hian Bawnglian Dairy Breeds Cattle 318 leh Dairy Hill Cattle 353 awm anga chhinchhiah a ni a, Bawnglian vulh hi an tlem tial tial nia hriat a ni bawk.