Serchhip-ah Health Department in World Environment Day hmangin IDC Fortnight hawnna an nei

Serchhip-a Health Department chuan nimin khan 'World Environment Day' puala hun hmangin 'Intensified Diarrhoea Control Fortnight' (IDCF) hawnna an nei nghal bawk.
Serchhip CMO Conference Hall-a he hun hman hi Deborah Vanlalchhuangi, District Programme Manager (NHM) chuan kaihhruaiin he hun hmanpuitu Serchhip SMO Dr. Lallawmkimi Chhakchhuak chuan 'World Environment Day' chu June 5-ah hman thin ni mah se June 10, 2023 thlenga Programme hmang tura ruahmanna siam a nih thu leh Intensified Diarrhoea Control Fortnight (IDCF) pawh June 5 atang vek khan tun thla ni 19 thleng awh tura hman a nih thu a sawi a. Kumin a 'World Environment Day'ah hian thupui atan 'Beat Plastic Pollution' tih chu hman a nih thu leh Plastic chu thil tangkai tak, a lo-a kan khawsak hleih theih tawh loh a nih thu sawiin, amaherawh chu Plastic-ah hian hman nawn chi loh, Single Use Plastic kan tih mai, hman khat daih tam tak kan hman avangin hei hian kan khawvel-ah a chhe zawngin nghawng a neih mek thu a sawi a. Kan leilung nasa taka a tihchhiat avang hian hmang tlem tura mitin in hma kan lak a tul thu sawiin, Hman tlem (Reduce) bakah hian Hman nawn (Re-use) leh hman zawh hnua paih darh mai lova thildanga hman tangkai (Recycle) te ngaih pawimawh thu a sawi a. Serchhip-ah hetiang Single Use Plastic hi kan la hman nasat thu pawh sawiin, ei leh in lam funna atana phei chuan hman loh a pawimawh thu leh hemi kawngah hian chhungkua a nu te an pawimawh thu a sawi a. Dawr leh sumdawnna hmunah puan atanga siam bag te hman uar thar a tul thu pawh a sawi bawk.


June 5 atanga June 19, 2023 thlenga hman tur 'Intensified Diarrhoea Control Fortnight' (IDCF) chungchang pawh sawiin Dr. Lallawmkimi Chhakchhuak chuan India rama kalpui mek National Health Policy 2019-in a tum ber chu India ram puma naupang kum 5 hnuai lam thihna 1000 zelah 39 ni mek chu 1000 zela 23-ah tihhniam a nih thu a sawi a. Naupang kum 5 hnuailam ah kawthalo avanga thi 6.4% an la ni reng tih sawiin, India ramah kumtin in naupang kum 5 hnuailam mi singruk velin an la thih phah reng bawk tih a sawi a. Hei vang hian Ministry of Health and Family Welfare, Govt. of India kaihhruaina hnuaiah Intensified Diarrheoa Control Fortnight (IDCF) chu kum 2014 atang khan kumtin ram pumah hman thin a nih thu a sawi a. Kumin ah pawh hian June 5 atanga June, 2023 chhung hian IDCF hi hman leh tur a nih thu a sawi bawk.

He hunah hian Serchhip Main Centre hnuaia ASHA te tan naupang kawthalo enkawl dan zirhona neih nghal niin Serchhip CMO Office-a DRCHO Dr. Samuela chuan zirtirna a pe a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man