Tunhnaia Serchhip-a Vawk thi te Sample enfiah atangin hri kai hmuh an la awm lo
Heng Vawk thi te chungchanga kan palai zawhna chhangin Serchhip District Veterinary Officer (DVO) Dr. R. Lalmakthanga chuan tunhnai a Serchhip khawchhunga Vawk damlo leh thite atanga Sample an lak, Rapid Test Kit hmanga an endik atangin Vawk hri leng thin, Classical Swine Fever (CSF), Porcine Reproductive and Respiratory Syndrome (PRRS) leh African Swine Fever (ASF) te hnuhma rinhleh tur âwm hmuhchhuah ala awmlo tih a sawi a, Vawk damlo thenkhat te chu damchhuak leh an awm thu pawh sawiin, tunlaia Vawk damlohna hri leng mek chu tunhma a Vawk damlo za-a za thihna ngei ngei ang chi a ni lo tih a sawi a, mipuite tan chi-aina tur a awm loh thu leh fimkhur erawh a pawimawh rêng thu a sawi a ni.
Serchhip DVO chuan Vawk natna chungchang ah hian tunhma a Vawk vulhtute an lo zirtir thin tawh anga mahni Vawk In leh a vel fai taka vawn leh Bleaching powder emaw, Chinai thi emaw, Tuisen hmang emaw te a enkawl fai chu a pawimawh reng thu a sawi a, tlang hri leng an inkaichhawn loh nan ranvulhna hmun inkalpawh tawnloh a that thu a sawi a. Tunhnaiah Swine Fever Vaccine chu Serchhip khaw pawnah an pe zo thawkhat tawh ti pawh sawiin, khawchhung ah pek leh tura ruahman mek a ni tih a sawi a, tlang hrileng avanga Vawk vulhna hrang hranga kal a remchan rihloh avangin boruak an la ngaihchan mek thu a sawi bawk.
Tunhnaia Serchhip khawchhung a Vawk damlo leh thite chungchang hi kar kalta ah khan Serchhip-a AH & Vety Department-a thawktute chuan an lo thlirho tawh a, he hunah hian hmalak dan tur hrang hrangte ngaihtuah nghal bawkin April ni 24 atang khan Vawk damlo thi atangin hmun hrang hranga sample te chu lakkhawm hna thawh a lo ni tawh a, heng te hi Aizawl Khatla AH&Vety Complex-a Epidemiological Center bakah Selesih-a College of Veterinary Sciences & Animal Husbandry-ah te endik mek a ni a, Sample enfiah tawh atangin ASF hri kai hmuhchhuah an la awmlo a ni.
Comments
Post a Comment