Tuikum Bial Zirlai Pawl General Assembly Tuikum bialtu MLA Er. Lalrinawma’n a hmanpui
Tuikum Bial Zirlai Pawl General Assembly-ah hian Er. Lalrinawma chuan zirlai kalkhawmte chu mahni inthunun thiam leh thiltum ah chiang chunga theihtawp chhuah tur leh an vela hnathawh tur awm apiangte a hniam emaw, a sang emaw thawk thiam turin a chah a, hemi kawngah hian theihtawp chhuah a pawimawh thu zirlaite chu a chah a ni. Hei bakah hian Zirlaite chu nakin lawka khawtlang leh ram hruaitu ni mai tur leh mipuite innghahna tur an nih thu Er. Lalrinawma chuan sawiin, nun uluka ruihhlo lakah fihlim tur leh Pathian rawn chung zela theihtawp chhuah turin a chah bawk.
Social Welfare Minister chuan chawimawina dawn chu a hlut thu leh a hlawha hlawh chhuah a nih avangin a ropui tih sawiin, “Vawiin a zirlai leh zirlai hruaitu lo kalkhawmte pawh hian chawimawina dawn tum ula, chumi tur chuan thawkrim rawh u. Chawimawina dawn hi a awlsam lo a, mi hlawhtlingte tan chauh a ni,” a ti a. Zirlai kalkhawmte chu an zirna kawngah theihtawp chhuah tur leh hna zawn kawngah pawh rim taka bei turin a fuih bawk a. Eng hna pawh taima leh rinawm taka thawh a pawimawh tih sawiin, hlawhtling tur chuan thawhrimna leh dawhthei taka nghah hram hram a pawimawh tih a sawi bawk. Tuikum bialtu MLA chuan bial a enkawlna kawngah zirlaite leh bial mipuite nen thawhhona tha tak an nei thin chu lawmawm a tih thu pawh he hunah hian sawiin, hmasawnna hna thawhna kawngah thurawn leh rawtna a hnena thlen zel turin a sawm nghal bawk.
Tuikum Bial Zirlai Pawl General Assembly hi an pawl Asst. Secretary B. Lalrohlua chuan akaihruai a General Secretary B.Lallawmkima hnen atangin report ngaihthlak a nih bakah an President Krosthanga pawhin thu a sawi a. Chawhnu lamah hruaitu thar thlanna an nei nghal a ni.
Tuikum Bial Zirlai Pawl hi kum 2013 khan din a ni a, kumin hi a kum 10-na a ni a. Tuikum Constituency-ah hian khaw 19 an awm a, khaw tinah hian zirlai pawl an ding deuh vek bawk.
Comments
Post a Comment