Jail-a duty thin in kaphlum

Serchhip District Jail-a Home Guard duty Lalrinthanga chuan Inrinni zing dar 2:00 vel khan a thawhpui Lalhruaitluanga @Mapuia chu an Barrack-ah a Duty-na a a ken Silai (SLR) hmangin a kap a, Mapuia hi Serchhip District Hospital panpui a nih hnuah a boral.
Serchhip District Jail-a Duty ve bawk te hnen atanga thu kan dawn danin Guardman Lalrinthanga (24), Bawktlang hi Zirtawpni zan dar 12:00 atanga dar 2:00 thleng khan Serchhip District Jail-ah hian Duty in Guardman Lalhruaitluanga (34), Chhingchhip Venglai hi dar 2:00 atanga zing dar 5:00 thlenga Duty tur a ni thung a. Zirtawpni zan khan Chengkawl khawrh an chhuah hnuah an Duty zui a, Duty inthlak hun, zing dar 2:00 velah he thil hi an Barrack-ah a thleng a ni.


Serchhip District Jail-a Duty midang ten an sawi danin Silai puak ri hriaa Barrack-a an va kal chuan Lalrinthanga hian khum-a mu Lalhruaitluanga hi lo kuahin a lo ko mawlh mawlh a, a theih anga an buaipui hnuah Serchhip Damdawi In rawn panpui niin kawng laka awm Mercy Hospital panpui hmasa mah se Doctor an awm loh avangin an rawn tlan tlang a, Serchhip damdawi In an rawn thlenpui hnu lawk hian a boral zui ta a ni. Silaimu hi Lalhruaitluanga nak veilam-ah lutin a hnunglam ding lamah a tlang niin a lang a, Lalhruaitluanga ruang hi Postmortem a nih hnuah Inrinni khan vuiliam a ni.

He thil thlen lai hian Barrack-ah midang awm an awm ve loh avangin thil thlen dan kimchang hi hriat theih a ni lo a. Serchhip District Jail-a Duty ve midangte chuan Lalrinthanga leh Lalhruaitluanga te hi inkawm nasa tak leh inzui chawt thin an nih thu sawiin, he thil thleng pawh hi thinrim avanga intihbuaina aiin tihpalh thil a thleng nia an rin thu an sawi a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar