Serchhip Entlang-a YMA Social Forestry EF&CC Minister in a hmunah a tlawh

Environment, Forest & Climate Changes Minister TJ. Lalnuntluanga chuan nimin tlai khan Serchhip Entlang hmuna ‘YMA Social Forestry’ chu tlawhin YMA ten ramngaw humhalh hna tha tak an thawk chu lawmawm a tih thu sawiin, CAMPA atangin an hmalak chhunzawm zelna atan cheng nuai 3 a hlan nghal bawk.

Serchhip Sub-Hqrs. YMA te enkawl ‘Social Forestry’ a tlawhna ah hian EF&CC Minister TJ. Lalnuntluanga chuan Serchhip-a YMA ten hun rei tak ramngaw an lo enkawl tawh hmun a tlawh thei chu a lawm thu sawiin, ramngaw leh nungcha humhalh chu an Department hmalakna mai-a tih theih a nih loh thu leh kan zavaia kan thawhho tulna a nih thu a sawi a. EF&CC Department hmalakna chu mi tute emaw bik tan a nih loh thu leh Department hamthatna tur a ni lo tih sawiin, tuna YMA ten ramngaw an humhalh mek chu a hlawkna teltu pawh Serchhip mipuite an nih thu a sawi a. Khawpui-a cheng ten boruak tha an hmuh theihna tura ramngaw siamna kawnga hmalakna kalpui mek a nih thu pawh sawiin, hei hi Nagar Vans tih a nih thu leh Municipal huamchhungah chauh kalpui tura ruahman ni mah se sawrkar laipui lama an nawrna angin Mizoram District khawpui tinah kalpui tum a nih thu leh Social Forestry pawh hemi a hmalakna ah hian telh tum a nih thu a sawi bawk.


He hunah hian Serchhip Sub-Hqrs. YMA President Kawlthuama chuan kum 1983 khan Serchhip VC te atangin Entlang-a Social Forestry enkawl hna hi YMA kutah a awm thu leh kum 1993 atangin Joint YMA in enkawl zuiin tunah hian Sub-Hqrs. YMA ten enkawl mek a nih thu a sawi a. Helai hmun hi hectare 100-a zau niin YMA chuan anmahni sum leh pai senga enkawltu an rawih thu leh ramngaw chhungah nungcha chi hrang hrangte a awm thu a sawi bawk.

Thenzawl DFO Lalbiakchama Chawngthu pawhin YMA ten kum 40 zet helai ramngaw an lo enkawl chu lawmawm a tih thu sawiin, a theih anga an Department atanga tanpuina an pek dan te pawh he hunah hian a tarlang bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar