MZP in thutkhawm an nei

 Mizo Zirlai Pawl (MZP) General Headquarters chuan nimin khan Aizawl-a MZP Conference Hall-ah Executive Committee thutkhawm neiin May 25, 2023-a MZP Federal Council Sitting vawi 56-na neih turah ‘Mizo hnam hrang hrangte hnam ziarang humhim leh kan inhriat-pawh lehzual theih nan zirlaibu-a telh turin MZP-in hmalak ni rawh se,’ tih leh ‘ZOEST hi kum 2024-ah buatsaih leh ni rawh se,’ te chu te chu chhawpchhhuah turin an pawm a. Manipur buaina kal mekah Manipur a Zohnahthlak zirlai pawl leh Community Tribe hrang hrang hruaitute nen a rang lama Joint Meeting neih ngei nise an tih bakah, Kan ram, kan hnam kal zel tur thlir chungin Mizorama hna lak leh hamthatna hrang hrangah a tling leh tlak, ram leilung fate ngei lak an nih zel theih nan hmalak an rel bawk a ni.

MZP hian Manipur buaina vanga Hnu-chham naupang rawn raltlan, Discipleship Making Ministry (DMM) Children Home-a naupang 30, Sawrkar enkawlna hnuaia Berawtlang-a awm mekte chu tlawhin tanpuina an hlan bawk a, heng naupang te hi sawrkar in Aizawl DC kaltlangin a enkawl mek a ni.